بيراميدز والصفقات الكبيرة: ليه التعاقد مع دييجو رولان صفقة تقيلة؟
من أول ما اتحول اسمه من نادي الأسيوطي لنادي بيراميدز، وإحنا كل فترة انتقالات بنشوف صفقات تقيلة جدًا بتنضم للفريق علشان تساعده في المنافسة على بطولة الدوري المصري، بداية بعبدالله السعيد لاعب الأهلي السابق، والبرازيلي كينو، وأحمد فتحي، وغيرهم كتير، وكان أخرهم رمضان صبحي، اللي عمل ضجة كبيرة لما اتنقل لبيراميدز، والصفقات التقيلة دي لسه مكملة، وشوفنا إمبارح النادي أعلن عن التعاقد مع المهاجم الأوروجواياني دييجو رولان على سبيل الإعارة، فتعالوا نعرف أكتر عنه والمراكز اللي بيجيد اللاعب فيها، وليه الصفقة تقيلة وهتبقى مؤثرة مع الفريق؟
بدأ رولان (27 سنة) مسيرته في نادي ديفينسور سبورتنج بأورواجواي سنة 2011 ولعب معاه موسمين، سجل فيهم 10 أهداف، وبعد كده انتقل لنادي بوردو الفرنسي من 2013 لسنة 2017 وسجل معاه 37 هدف، وكسب معاه كأس فرنسا، وبعد كده اتنقل بين أندية الدوري الإسباني (ديبورتيفو لاكورونيا، وليجانيس، وديبورتيفو ألافيس) قبل ما يخوض أول تجربة ليه في أفريقيا مع بيراميدز، ولعب رولان على المستوى الدولي مع منتخب أوروجواي جنب الثنائي إدينسون كافاني، ولويس سواريز، وهو بيجيد اللعب في مركز المهاجم الصريح، أو على الجناحين الأيمن والأيسر.
والصفقة دي الكل متوقع إنها هتبقى مؤثرة جدًا للفريق، خصوصًا إنه مهاجم قناص وهداف ولاعب دولي، ومعظم الجمهور كان شايف إن الفريق محتاج مهاجم بيخلص الهجمة ويترجمها لهدف، لإن الفريق فيه لاعيبة كبيرة جدًا في كل المراكز، وكمان متوقع إنه هيكوّن رباعي هجومي قوي جدًا مع عبدالله السعيد، وإيريك تراوري، ورمضان صبحي.
وصفقة دييجو رولان هي الصفقة التانية لبيراميدز في الميركاتو الشتوي ده بعد صفقة انضمام مدافع نادي إنبي والمنتخب الأوليمبي أسامة جلال.