في الألعاب المختلفة جوا وبرا مصر، البنات بيرفعوا رأسنا وبيثبتوا وجودهم وأحقيتهم إنهم يبقوا موجودين في البطولات الكبيرة محليًا وعالميًا، من كرة القدم للتنس للسباحة للإسكواش وكمان رفع الأثقال، في كل رياضة هتلاقي مصريين مشرفنا في كل بلاد العالم، وبيتألق وسطهم العنصر النسائي بإنجازات في كل الألعاب، ومنهم اللي حققت إنجازات غير مسبوقة في لعبتها.. فتعالوا نعرف بعض منهم ونشجعهم.
فريدة عثمان
أو “الفراشة المصرية” زيّ ما بيسموها، آخر إنجازاتها كسبت الميدالية الذهبية لسباق 50 متر في بطولة أمريكا المفتوحة للسباحة، وبكده تكون فريدة كسبت 3 ميداليات في المسابقة دي، واللي بيعتبر إنجاز كبير بعد عودتها للمشاركة بعد ما توقفت 6 شهور عن السباقات.
فريدة من مواليد 1995، وهي أول مصرية تحمل أي رقم قياسي عالمي في السباحة، وأصغر متسابقة تشارك في دورة الألعاب العربية بمصر سنة 2007، وقتها كان عندها 12 سنة، وتم اختيارها علشان تمثل مصر فيها بعد ما حصلت على لقب أفضل سباحة في البطولة المصرية لنفس السنة.
سارة عصام
صاحبة “الحذاء الذهبي” في الدوري الإنجليزي من وهي عندها 20 سنة، المصرية سارة عصام لاعبة كرة القدم في نادي ستوك سيتي الإنجليزي، ونجمة المنتخب الوطني للسيدات، وتعتبر أول لاعبة مصرية تحترف في الدوري الإنجليزي، وشاركت في أكتر من 25 مباراة دولية، وارتبط اسمها بمحمد صلاح هداف ليفربول، واعتبروها “الملكة المصرية” والنسخة النسائية من محمد صلاح في الدوري الإنجليزي، وفي بداية حياتها واجهت رفض كبير لاختيارها كرة القدم عن باقي الرياضات، واللي بيتقال إنها رياضة للرجالة أكتر، لكنها صممت وبالفعل أثبتت نجاحها في سن صغير.
فايزة حيدر
أول مدربة لفريق كرة قدم رجال في مصر، دخلت فايزة التاريخ بعد ما حصلت على منصب المدير الفني لفريق جولدي للرجال في الدرجة الرابعة للدوري المصري، ابتدت بلعب الكرة في الشارع مع الأولاد، ووصلت لقائدة لمنتخب مصر للسيدات، ودلوقتي هي أول امرأة تدرب فريق محترف للرجال في مصر، وخدت شهادة معتمدة من الدوري الإنجليزي الممتاز، واللي تعتبر أول مدربة في مصر تحصل عليها من الرجال والسيدات، بتحكي فايزة عن الصعوبات اللي واجهتها وكان أكبرها هي السخرية من اللاعبين الرجال لما بيلاقوا إن اللي هتدربهم ست، لكن لما بيلاقوا إن المعلومات اللي بتدربهم على أساسها هتفيدهم وترفع من مستواهم، بيبتدوا ينفذوها ويبعدوا عن أي سخرية.
هنا جودة
![]()
عن: العين الإخبارية 
عن: العين الإخبارية
اللي تصدرت التصنيف العالمي لتنس الطاولة كأول لاعبة مصرية وأفريقية، أسطورة لعبة تنس الطاولة اللي عندها 12 سنة، وكسبت لاعبات من فرق السيدات أكبر منها بأكتر من 10 سنين، لاعبة النادي الأهلي ومنتخب مصر لتنس الطاولة، وحصدت ألقاب كتير منها لقب بطولة الجمهورية لناشئات تنس الطاولة في كل المراحل العمرية، وأول لاعبة في مصر وأفريقيا تحصد الميدالية البرونزية في بطولة العالم للقارات، وبطولة الجمهورية للكبار، اللي كسبتها بعد ما تغلبت على فرح عبد العزيز لاعبة نادي الزمالك اللي عمرها 27 سنة.
نور الشربيني
بطلة مصر في لعبة الإسكواش، واللي حققت بطولات وإنجازات كتير من صغرها، أول بطولة كسبتها كانت بطولة الجزيرة وهي عندها 8 سنين، وحصلت على لقب أحسن وأصغر لاعبة في بطولة السيدات، وتم تكريمها من الاتحاد الدولي، وبقت أصغر لاعبة في العالم تدخل في قائمة أول 10 مراكز للتصنيف في الإسكواش على مستوى العالم، وآخر بطولاتها كانت الفوز بلقب بطولة مصر المفتوحة للإسكواش، اللي تعتبر واحدة من أكبر 8 بطولات بلاتينية عالمية للرجال والسيدات.
فاطمة عمر
الأسطورة المصرية فاطمة عمر بطلة رفع الأثقال البارالمبية في تاريخ مصر وأفريقيا والعرب، اللي تم اختيارها أفضل لاعبة في أكتر من مرة في سجل اللجنة البارالمبية الدولية، وصاحبة الرقم العالمي في وزن 56 كجم، ورفعت وزن 142 كجم، وكسرت الرقم العالمي والأولمبي واتسجل باسمها، وحققت الميدالية الفضية في بطولة كأس العالم البارالمبية 2020 برفع 121 كجم، وبدأت فاطمة اللعبة من سنة 1994، وقتها كان اتعمل أول منتخب سيدات لرفع الأثقال البارالمبي، وأول بطولة شاركت فيها كانت بطولة أوروبا المفتوحة، وكسبت فيها الميدالية الذهبية، وكمان كسرت الرقم العالمي في البطولة دي وهو 67 كجم وهي رفعت 100 كجم.
جيانا فاروق
بطلة العالم في الكاراتيه، انضمت لمنتخب مصر للكاراتيه في سنة 2009، وكسبت أول بطولة جمهورية في الكاراتيه وقتها، وهي أول مصرية عربية أفريقية تحصل علي ذهبية العالم سنة 2014 بألمانيا، جيانا خريجة كلية الصيدلة، وابتدت مشوارها في الكاراتيه بالصدفة في النادي الأهلي وفضلته عن لعبتها الأساسية وقتها وهي السباحة، بتمثل منتخب مصر والنادي الأهلي، وكمان اتأهلت لدورة الألعاب الأولمبية بطوكيو لتصبح أول مصرية وعربية وأفريقية تنجح في التأهل إلى للأولمبياد.
ميار شريف
“فتاة مصر الذهبية”، أول لاعبة تنس مصرية تحقق بطولة تشارلستون الدولية للتنس بأمريكا، ميار مش الوحيدة في عيلتها اللي عندها شغف وحب للعبة التنس، لكنها استمدته من أختها الكبيرة اللاعبة رنا شريف، وشاركوا مع بعض في بطولات جامعية في أمريكا، وهي من مواليد 1996، واتخرجت بشهادة في مجال الطبي الرياضي من جامعة ببردين في 2018، لكنها بدأت في لعب التنس من وهي عندها 5 سنين، وبانت موهبتها في مرحلة الناشئين ونجحت في دخول قائمة أفضل 50 لاعبة بالعالم في سن الـ 16.