بمناسبة تكريمه: أشهر جمل لسه معلقة معانا لخالد صالح

إدارة مهرجان أيام القاهرة للمونودراما أعلنت إنها هتكرم النجم الراحل خالد صالح وهتهدي الدورة الخامسة باسمه، واللي هتتعمل تحت رعاية دنيفين الكيلاني، وزيرة الثقافة، في الفترة ما بين 12 لـ16 سبتمبر، تكريمًا لمشواره الإبداعي والفني. وبالمناسبة دي، حبينا احنا كمان نكرمه بس على طريقتنا، ونجيب لكم جمل معينة تبان عادية وبسيطةب س موهبته خلت الجمل دي تاريخية وعايشة معانا، ولما تسأل الناس عليها تقولك أه فاكراها وفاكرة المشاهد اللي اتقالت فيها.

أنا بابا يلا – تيتو

مين لحد دلوقتي مش بيسمعها غير بصوت خالد صالح؟ اتقالت في فيلم تيتو مع أحمد السقا في أول مشهد كان بيجمعهم في الفيلم، كان عامل فيه دور ظابط “العقيد رفعت السكري” وبيستغل منصبه لصالحه؛ وجند واحد من خريجين الأحداث علشان يشتغلوا في عمليات وصفقات مشبوهة ويجيب منها فلوس. يمكن ناس كتير قدمت أدوار شبه ده وعلى نفس الخط الدرامي، بس ماحدش عمل إيفيه وعلق مع الناس زيّه.

وتفتكري كده هشبع يا يسرية؟ – أحلى الأوقات

إبراهيم في فيلم “أحلى الأوقات” هو راجل مصري وعربي أصيل، كل همه يروح بيته وياكل لقمته وينام علشان يصحى تاني يوم يروح الشغل؟ وزيّ أي زوجين بيتخانقوا، وزيّ أي زوج أصيل بيهرب من الخناق ويسأل عن الأكل “أنا جعان عايز أكل”، وهي ترد في عز عصبيتها “تحب أرميلك نفسي من فوق السطوح يا إبراهيم؟”، وهو وبكل براءة يرد عليها “وتفتكري كده هشبع يا يسرية؟”. المهم إنه بعد كده غضب عليها وقال رايح اتغذى عند أمي، ويسرية زيّ أي ست أصيلة بدل ما تراضي جوزها تقول له “هات ربع جبنة تلاجة وأنت جاي”.

اللي مالوش خير في حاتم مالوش خير في مصر – هي فوضى

حاتم أمين الشرطة الفاسد في فيلم “هي فوضى”، بياخد رشوة مقابل خدمات بيعملها للناس. وفي المشهد ده كان مقضيها أكل حواوشي في القهوة، والناس بتعدي عليه تطلب خدمة بالدور وتكرمش له الفلوس. بقاله 20 سنة بياكل الحواوشي من غير ما يدفع، وصاحب المحل قاله “مفيش مرة الحواوشي عجبك وقولت أدفع فيها”، راح رد عليه بالجملة الشهيرة “اللي مالوش خير في حاتم مالوش خير في مصر”. وبرضه من ضمن جمله الشهيرة في الفيلم “أنتوا فاكرين البلد فوضى! البلد دي فيها حكومة، والحكومة دي هي أنا”.

لو ناوي تمد إيدك وتفتح الستارة الله.. أعلم هتشوف إيه ورا الكواليس – فتح عينيك

مشهد من فيلم “فتح عينيك” اللي مثل فيه خالد صالح دور عم سيد موظف الأرشيف اللي عايز يكشف عن الفساد هو وعلي “مصطفى شعبان”، وواحد من المشاهد المؤثرة اللي بينه وبين علي وهو بيقوله “أوعى تفتكر لما تعرف الحقيقة هترتاح، الدنيا مسرح كبير وكل واحد بيعمل الدور اللي مكتوب له، لو أنت ناوي تغير دورك وتمد إيدك وتفتح الستارة الله أعلم هتشوف إيه ورا الكواليس.. بس ممكن اللي تشوفه يخليك ماترجعش تشوف الدنيا زيّ ما كانت ولا تقدر تغمض عنيك وتنام وأنت بالك مرتاح”.

اهرب يا ياسين – حرب إيطاليا

رجل الأعمال الفاسد بكر، بالرغم إنها كانت شخصية شريرة بس ماتعرفش تكرهها لخفة دمها في أصعب وأهم المواقف، لأ ده كمان ممكن يصعب عليك من الحاجات اللي بتحصل له. بكر “خالد صالح” بيجري طول الفيلم على عقد ضايع هو وياسيين حمزاوي “أحمد السقا”، وفي مكالمة بينهم وهو بيقوله “أوعى تفتكر إنك هتهرب من إيدي يا ياسين”، ولما قاله ياسين إن البوليس بيجري وراه هيفلت منهم وييجي لحد عنده، راح قايل له “لا لا لا، اهرب اهرب يا ياسين اهرب ربنا معاك”، المشهد ده بيستخدموه لحد دلوقتي في كوميكس على السوشيال ميديا.

هتروح على فين؟ العالم ده كله بتاعي – فتح عينيك

جسد خالد صالح دور الشيطان بجد فى فيلم “الريس عمر حرب” والناس فعلًا كرهته، ومن أشهر الجمل اللي قالها لهاني سلامة لما كان بيحاول يمشي من شغلانته في كازينو للقمار وبصفته مدير الكازينو والأمر الناهي فيه قال”اللي اتعود يعيش إله.. صعب إنه يعيش عبد”، و”هتروح على فين؟ العالم ده كله بتاعي”.

أخر كلمة: ماتفوتوش قراءة: 7 روايات رومانسية عربية هيعيشوك تجربة بين الحب والخيال