في الوقت الحالي بقى في اهتمام وتركيز كبير على شكل الجسم وأهمية الوصول لجسم مثالي (اللي تعريفه دلوقتي إنه يكون رفيع) علشان للأسف أهمية الموضوع ده وصلت لإحساس البعض إن شكل جسمهم ليه علاقة بقيمتهم أو الـ self worth بتاعهم.. وده بيرجع بسبب الضغط اللي أفراد المجتمع والصورة النمطية “للجسم المثالي” اللي بتفرضه نفسيًا بطريقة غير مباشرة على الآخرين. ومع تشجيعنا طبعًا للجميع إنهم يهتموا بصحتهم وشكل جسمهم، مهم كمان إننا نسلط الضوء على أهمية حب وتقبل جسمنا، والتأكد إننا بنسعى لجسم أفضل للأسباب الصح.
الشباب بالذات هما الأكثر عُرضة إنهم يقعوا فريسة الأفكار السلبية والهوس بالجسم المثالي، لرغبتهم المُلحة إنهم يـ “fit in”. فبتلاقيهم في فترة الصيف وخصوصًا وقت السفر بيتبعوا أنظمة غذائية قاسية وبيروحوا الجيم باستمرار، وكإنهم في مسابقة شرسة على أساسها هيتم تحديد هما هيقدروا يستمتعوا بالصيف ولا لأ. للأسف النوع ده من التفكير بقى منتشر جدًا وبسببه بقى في بعض الناس بيختاروا إنهم ينعزلوا أو مايسافروش خوفًا من نظرة الناس لو جسمهم مش مطابق “للمواصفات القياسية”.
علشان مايتحولش الموضوع من الاعتناء بالجسم والصحة العامة (اللي طبعًا شيء صحي) لمنطقة ضالمة وسامة من الهوس بمعايير الجمال والخوف المستمر من نظرة الآخرين، لازم تراقب الحوار الداخلي اللي بيدور جواك لما تيجي تفكر في شكل جسمك. لازم تعرف إن من الطبيعي جدًا وجود دهون أو stretch marks في جسمك لإنك إنسان. لازم تاخد بالك لما تحس إنك بقيت تحط نفسك في مقارنات مستمرة مع أجسام ناس تانية لإن بعيدًا عن أي كليشيهات بس فعلًا كل جسم وله مميزاته وطبيعته المختلفة، وأي مقارنة فعلًا مش هتكون عادلة.
والشيء المهم جدًا أثناء عمل ريجيم أوالذهاب للـ gym هو تحديد هدفك. الهدف مش إنك تعمل ده علشان تكون صورك شكلها مناسب وشبيه لصور الـ Influencer أو المشاهير، ولا علشان أنت كاره نفسك ومحتاج تتغير، بل بالعكس. أنت علشان بتحب نفسك فبتعتني بها ومهتم بلياقتك البدنية اللي هتساعدك تحصل على أفضل وأكثر صحية. لازم كمان تكون صبور خلال الرحلة دي، ولازم تتقبل جسمك في كل مراحله وزيّ ما هو لإن جسمك زيّ ما له حق عليك إنك تهتم به وتغذيه، فهو كمان له حق عليك إنك تحبه وتنظر له بإيجابية.