العيد بيحب الفرح والانبساط والفرفشة.. أجازة بتاخدها من ضغوطك وهمومك فلازم تنبسط بها، وزي ما “العيد فرحة وأجمل فرحة” على رأي صفاء أبو السعود، جمعنالك بلاي ليست تسمعها في أجازة العيد عجبتنا مؤخرًا هتعملك جو فرح وانبساط في أي مكان أنت رايحه.
استنى استنى – روبي
“استنى استنى استنى .. ده أنت هتتهنى هتتهنى” الأغنية والكليب نفسه كانوا عاملين جو، وزاد عليهم أداء روبي بخفتها وروحها وطلتها الحلوة.
من الأغاني اللي علقت معانا مؤخرًا وننصحك تضيفها في البلاي ليست.
ارقصوله – دنيا سمير غانم
من ألذ الأغاني والاستعرضات اللي اتعملت في رمضان، عملت حالة عند الأطفال والكبار وبدؤوا يقلدوا استعراضتها.
والمختلف كمان في الأغنية إنها كانت خليط بين المصري والتركي.
إيه اليوم الحلو ده – أحمد سعد
“إيه اليوم الحلو ده؟ إيه الناس الحلوة دي؟” بقالها شوية بس لسه تريند في كل الأفراح والمناسبات وليالي الملاح، ومناسبة أوي لأجواء العيد.
شغلها مع الأسرة وأنتوا بتقزقزوا السوداني وتاكلوا الكحك.
اللي بينا – عمرو دياب
“اللي بينا لحظة حلوة عشتها معاك” اتعملت السنة اللي فاتت، بس لسه الناس بتشاركها مع بعض على الفيس بوك وإنستجرام بسبب القصة اللي في الأغنية، مبهجة في مشاهدها من أولها لآخرها.
شغلها في العربية وأنت طالع على إسكندرية.
يا عيد – نانسي عجرم
صورت فيها نانسي مشاهدها كلها مع أسرتها، وكانت أجواء الأغنية مليانة فرح وانبساط ورقص وأجواء عيد، لإنها كانت عاملاها للكريسماس.
بس مافيش مانع نشغلها العيد ده ونرفرفش مع المزيكا الحلوة.
تعالى – عمرو دياب
انتشرت بعد أيام من عرضها في شهر رمضان، وعمرو دياب اللي معروف بأجوائه الحماسية والشبابية وصوته دايمًا اللي فيه فرحة.
تقدر تضيفها في البلاي ليست ومش هتندم.