الأغاني من مميزاتها إنها بتساعد في استرجاع الروح والحالة اللي في الأغنية حتى لو أنت مش عايشها في لحظتها، ومنها أغاني رمضان، اللي بتحب دايمًا تشغلهم في رمضان علشان نسترجع اللحظات والأجواء والروحانيات بتاعته، لإننا بنعتبرها جزء من فرحة وروح رمضان. وللسبب ده جمعنا لكم بلاي ليست بتشمل الأغاني اللي بنحب نسمعها في الشهر الكريم، بس الجديد هنا إنها كلها مختلفة عن بعضها، مش بس أغاني نوستالجيا ولا بس أغاني مصرية.. حط الهاند فري واسمع معانا.
رمضان جانا – محمد عبد المطلب
من أقدم الأغاني اللي اتعملت عن الشهر، بنسمعها دايمًا لما يشغلها الراديو بعد ما تعلن دار الإفتاء وتقول جملتها الشهيرة “اليوم هو المتتم لشهر شعبان وغدًا أول أيام شهر رمضان .. كل عام وأنتم بخير”. الأغنية دي أيقونة من أيقونات رمضان، وكلمات حسين طنطاوي بتاريخ 1943.
حسين الجاسمي – رمضان في مصر حاجة تانية
حسين الجاسمي من أكتر المطربين العرب اللي غنى باللهجة المصرية وأكترهم برضه اللي غنى لمصر، غنى “رمضان في مصر حاجة تانية والسر في التفاصيل، في كل حتة بنتمشى فوانيس وزينة في الشارع .. صوت الأذان يدخل قلبك ونصلي تراويح في الجامع”. الأغنية كانت حلاوتها في إنها كانت مجمعة كل التفاصيل اللي بنعيشها في الشهر.
أهو جيه يا ولاد – ثلاثي غنائي
“جبت لنا معاك الخير كله من الصبح نقوم ونحضر له” .. أول لما بتشغلها بتفتكر صوت الثلاثي المميز؛ وفاء مصطفى وصفاء يوسف وسناء الباروني. تم إنتاجها سنة 1959 وقرروا ساعتها إنهم يختاروا تلات أصحاب علشان يغنوا الأغنية دي، وفي روايات بتقول إن الأغنية وقتها اتكلفت 140 جنيه، من ضمنهم 20 جنيه للتلحين.
محمد منير – رمضان جنة
غناها الكينج محمد منير في 2009، من كلمات نبيل خلف ووليد سعد، والموزع الموسيقي توما. والمميز فيها صوت منير، اللي هو واحد من الأصوات اللي نقدر نقول عليها بتعبر عن روح مصر بامتياز.
فنانيس – مرحب مرحب يا هلال
اتعملت السنة اللي فاتت، وكان أبطالها كارتون فنانيس اللي كلنا بنحبه، وناس كتير قالت عليه بيفكرنا ببكار. الكارتون اتعمل من كام سنة، وبدأنا نتعلق به لخفة دم الشخصيات وعفويتهم، وبقينا نستناه بشغف كل سنة.
حكيم – رمضان كريم
“رمضان كريم فتح يا عليم، 30 يوم فيه هنا وسعادة” .. غناها حكيم كأغنية دعائية لمسلسل “رمضان كريم”، أجواء المسلسل كانت كلها في الشهر الكريم، من تراويح وسحور وفطار وعمل كنافة وقطايف وموائد الرحمن، ودي أكتر حاجة شدت الناس في المسلسل.
يلا نكمل لمتنا – حسين الجسمي
أغنية بصوت حسين الجاسمي، من الأغاني الجديدة والمميزة، وهي رحلة نوستالجيا مع كل الحاجات اللي بنحبها وبتفكرنا برمضان، زيّ فطوطة وفوازير شيرهان.
رمضان نوّر – محمد حماقي
كانت بصوت محمد حماقي وبمشاركة مجموعة كبيرة من النجوم، وكانت دعاية علشان تجذب الناس إنها تتبرع لمصر الخير وتساهم في إطعام أسر بإنهم يتبرعوا بكراتين رمضان.