أحدث تقنيات ربط التكنولوجيا بالتعليم في السعودية؛ نظام إلكتروني جديد هيسهل عمليات كتير للطالب وولي الأمر. شركة تيتكو لتطوير تقنيات التعليم بتطلق نظام “مصروف”، وده عبارة عن تطبيق ومنصة هتكون عن طريق إسورة أو ساعة في إيد الطلاب، هتسهل عمليات الشراء أو دفع المصاريف وكمان التواصل مع أولياء الأمور، ده غير ضبط الحضور والانصراف للطلاب بطريقة منظمة.
النظام هيكون عليه 4 تطبيقات؛ تطبيق “ولي الأمر” وده هيتمكن من خلاله أولياء الأمور من شحن رصيد الطالب وهيكون الجهاز مقترن بجهاز ولي الأمر، ده غير ميزة تانية وهي تحديد نوع الأكل اللي بيسبب حساسية للطالب، ويقدر كمان يحدد الأكل والشرب لو الطالب بيتبع نظام غذائي معين. وولي الأمر من خلال التطبيق هيقدر يعرف وقت دخول وخروج الطفل من المدرسة ووقت ركوبه للباص، ويقدر يعرف أخر المستجدات في المدرسة ويوافق على الأنشطة المختلفة ويدفع رسومها إلكترونيًا.
التطبيق التاني هو “المقصف” وده بيمكّن الطالب إنه يشتري عن طريق الإسورة أو الساعة، عن طريق إن يعمل مسح لكود على موبايل موظف المقصف، وفي حالة إن الطالب بيعاني من حساسية تمنعه من أكل أو شرب معين مش هيكون مسموح له شراء الأكل ده.
ده غير تطبيق “حضور” اللي بيساهم في تحديد مكان الطالب، لإن الجهاز بيعدي على جهاز استشعار عند بوابة المدرسة، فيقدر ولي الأمر إنه يطمن على الطفل ومواعيد دخوله وخروجه من المدرسة.
وتطبيق “الحافلة” مخصص لباص المدرسة، بيأكد المشرف ركوب الطلاب بعددهم كامل ويبعت إشعار فوري لولي الأمر بركوب طفله الباص، وإشعار لما يكون الطفل قريب من موقع الوصول.
نظام “مصروف” هيتم تطبيقه من بداية السنة الدراسية دي، على 84 ألف طالب في المدارس الخاصة، بفكرة مبتكرة بتواكب مستهدفات رؤية المملكة 2030، وممكن الفكرة تحصل على اهتمام واسع وتشمل باقي مناطق السعودية في السنين الجاية لو التجربة أثبتت نجاح السنة دي.