الكلاب البلدي أو كلاب الشارع موجودة من أيام الفراعنة، وهما ليهم أهمية كبيرة واهتمام من المصريين القدماء لدرجة إنهم كانوا بيقدسوهم، لإنهم أوفياء وفيهم صفات بتميزهم عن أي أنواع كلاب تانية، ومميزات بتخليهم يعرفوا يتعودوا على أي بيئة ويتعايشوا تحت أي ظروف، وكمان مش مؤذيين زيّ ما ناس كتير فاكرة، مجرد ما تقدملهم رعاية واهتمام وحب، هتلاقي منهم طيبة ووفاء ملهمش مثيل، أو حتى مجرد إنك تسيبهم في حالهم ومتأذيهمش، مش هيأذوك، وفي فيلم تسجيلي قصير اسمه “أهل الخلاء”، “People of Desolation” عمله علي صبور، بيبين الجانب الإيجابي والسلبي ليهم.
فيلم مدته ربع ساعة، بيعرض حياة كلاب الشارع في مصر، فكرته جت للمنفذ من حوالي 4 سنين، لكن تنفيذها كان بيواجه شوية صعوبات، وأخيرًا الفيلم خرج للنور دلوقتي، وخلال المدة دي، كان بيحرص علي إنه يقدم أكل للكلاب في الشارع ويهتم بيهم ويلاعبهم، واتفاجئ في البداية إن الكلاب هما اللي خايفين منه، عكس ما الناس كلها واخدة فكرة إن الكلاب شرسة والناس عادة هي اللي بتخاف منهم، لكن الكلاب في الحقيقة كانوا خايفين في بداية تعاملهم، وده من كتر القسوة والمعاملة الصعبة اللي بيشوفوها كل يوم من الناس في الشارع.
لكن بعد ما اهتم بيهم وقدملهم الحب والرعاية لوقت قصير، اتفاجئ بمعاملة جميلة وحب منهم وثقة واطمئنان رغم كل الأسباب اللي تخليهم ميثقوش فيه علشان اللي بيتعرضوله، وبيحكي علي صبور عن المعني الحقيقي للحماية والحب والثقة اللي لقاها من كلاب الشارع.
وجات فكرة الفيلم من المؤسسة الخيرية Animal Protection Foundation، ومؤسسة Hope لإنقاذ وإعادة تأهيل الكلاب البلدي، وبيشكرهم صانع الفيلم على مجهودهم لحماية الكلاب أولًا، ولإلهامه بفكرة الفيلم ثانيًا.
