بيتر ميمي من المخرجين اللي وجود اسمهم لوحده بيبقى كافي إنه ينجح أى عمل ويقنع أى مشاهد إنه يتفرج.. ببساطة لإن بيتر ميمي مبيعملش أى عمل إلا لو كان مختلف ومؤثر بكل المقاييس! ومخرج بقيمته وموهبته الكبيرة، أكيد لما بيعلن عن أى عمل جديد بيبقى الكل عايز يعرف تفاصيل أكتر عنه.. فتخيلوا لما يكون الفيلم ده عن الروبوتات! بيتر ميمي أعلن عن فيلمه الجديد “موسى” اللي بيعتبر أول عمل سينمائي بيتكلم عن الروبوت في الوطن العربي.
بدأ المخرج الفيلم ده من فترة كبيرة، واللي تطلب 4 سنين من التحضيرات والتصوير والاهتمام بالجرافيكس، بالإضافة لمناقشة مهندسين متخصصين وأطباء الصحة النفسية للاهتمام بكل التفاصيل وضمان خروج فيلم سينمائي للجمهور بدون أخطاء. وتم كمان متابعة الدراسات والنتائج اللي توصلوا ليها في عمليات التحكم عن بعد. ووضح ميمي خلال منشوره على الانستجرام إن المشروع ده كان بيهدف فيه إنه يعمل طفرة وتغير في محتوى وشكل الأعمال السينمائية.
الفيلم من إنتاج شركات إنتاج سينرجي فيلمز ونيوسنشري وأفلام مصر العربية، ولكن لحد دلوقتي لم يتم الإعلان عن الأبطال المشاركين أو وقت عرضه بالتحديد، ولكن أكد المخرج عن نزول البرومو ومن بعدها الفيلم في السينمات قريباً.. وبعد ما شوفنا إبداعه في أفلام زى حرب كرموز وكازابلانكا، أكيد مش هنتوقع أقل من تحفة فنية في عمل أخد 4 سنين من التحضيرات والعمل الجاد!