بعد ما سبب ذعر: كل اللي محتاج تعرفه عن “جدري القرود”

مرض انتشر الكلام عنه في الفترة الأخيرة بعد إعلان إصابات في دول مختلفة، وسبب ذعر لمواطنين كتير بيسألوا وعايزين يعرفوا أكتر عن المرض ومدى خطورته، أعراضه، وإيه هي طرق الوقاية منه، هل في علاج أو لقاح بيقلل نسبة الإصابة بيه؟ طب إيه هي طرق انتشاره علشان نبعد عنها، هل هو وباء؟ كل الأسئلة دي بتدور في بالنا كلنا وعايزين نطمن أكتر، علشان كده جمعنالكم كل المعلومات اللي نعرفها لحد دلوقتي من مصادر موثوق فيها.

في بيان وزارة الصحة المصرية، الوزارة صرحت إنها بتتابع بشكل دقيق الوضع الوبائي على مستوى العالم للفيروس، ولحد دلوقتي مافيش أي إصابات أو حالات اشتباه في مصر. أما عن الفيروس نفسه، فهو مش بينتشر بسهولة ومش بينتقل من خلال الهواء لمسافات طويلة. والعدوى بتكون نتيجة التواصل الجسدي المباشر مع الحيوان المصاب، ومخالطة المصابين بشكل مباشر لفترة طويلة.

وحسب كلام منظمة الصحة العالمية اللي اتنشر في سكاي نيوز “فيروس جدري القرود ينتقل إلى البشر من طائفة متنوعة من الحيوانات البرية، ولكن انتشاره على المستوى الثانوي محدود من خلال انتقاله من إنسان إلى آخر. وإنه يعتبر مرض معدي عادة يكون خفيفًا، وهو متوطن في مناطق من غرب ووسط قارة إفريقيا. وينتشر المرض من خلال الاحتكاك المباشر؛ وهو ما يعني إنه يمكن احتواؤه بسهولة من خلال تدابير مثل العزل الذاتي والنظافة فور تشخيص أي إصابة جديدة.”

عن: الغد

أما عن الأعراض، فبتكون ارتفاع في درجة الحرارة وطفح جلدي، وطرق الوقاية هي تجنب ملامسة الحيوانات اللي ممكن تحمل الفيروس أو اللي بيتم العثور عليها ميتة، وتجنب ملامسة أي مواد سبق ملامستها من الحيوانات، وعزل المصابين عن المعافين لتجنب العدوى، وغسل الإيدين بالمياه والصابون أو استخدام الكحول. وفي حالة رعاية المرضى، لازم يتم ارتداء الكمامات والقفازات للوقاية. أما عن الحيوانات المصابة، فلازم اتخاذ إجراءات الحجر البيطري معاها.

الدكتور خالد عبد الغفار، وزير التعليم العالي والقائم بأعمال وزير الصحة، صرح بـ”إن فيروس جدري القرود غير مقلق على الإطلاق لكن الناس بتقارنه بكوفيد 19، والموضوع مختلف تمامًا”، وأشار إن الفيروس ملوش الفرصة للتحول ومش جديدًا، وتم اكتشافه من أكتر من 50 سنة، وليه تطعيم، وكمان أي حد أتولد قبل سنة 80 عنده مناعة منه، حسب اللي اتنشر في مقال على اليوم السابع.

الوضع في البلاد العربية مختلف، بين بلاد بتعلن عن حالات إصابة واشتباه، ودول بتنفي وجود الفيروس فيها. والإمارات أعلنت عن أول حالة إصابة بالفيروس، وبتكون أول دولة في الخليج يظهر فيها حالات إصابة.

وعن اللقاح، وفقًا لمنظمة الصحة العالمية، مافيش أي علاج أو لقاح متاح لمكافحة فيروس جدري القرود، رغم إن التطعيم السابق ضد الجدري أثبت نجاح عالي في الوقاية من جدري القرود.

أخر كلمة: ماتفوتوش قراءة: ملجأ حيوانات ضالة في المغرب يعمل بأيدي المشردين

تعليقات
Loading...