وسط ضرب نار وصراعات ومطاردات كتير بتتم بين لصين مسلحين وشابة لوحدها، بنشوف أحداث تشويقية في برومو فيلم الفنانة منى ذكي المنتظر “الصندوق الأسود” واللي نزل امبارح علشان يحمس الجمهور أكتر وأكتر. أحداث الفيلم بتتم كلها داخل منزل منى زكي أو “ياسمين” اللي بيتم الهجوم على بيتها فبيتحول يوم عيد ميلادها لكابوس مرعب بتحاول فيه الهروب من المعتدين.
الفيلم بيدور في إطار رعب وأكشن بنشوف فيه محاولات ياسمين في الهروب من الموت، ووجود مؤشر الساعة بيبين أهمية عامل الوقت في تطور الأحداث، فبين محاولة اللصوص في إنهم يسرقوا شيء مهم وبين محاولات ياسمين للنجاة منهم، بنشوف تصاعد في الأحداث. والنوع ده من الأفلام المصرية بيُعتبر قليل ومش موجود بكثرة، الأمر اللي يخلينا كمشاهدين فخورين بوجود النوع ده من الأفلام اللي مش بس مختلف من حيث النوع، ولكنه كمان من إنتاج ضخم بنشوف فيه جودة فيلم شبيها بأفلام هوليوود. الفيلم ده بيمثل عودة قوية لمنى زكي بعد أربع سنين غياب عن شاشة السينما.
الفيلم من بطولة منى زكي، محمد فراج، ومصطفى خاطر، وشريف سلامة، سيناريو وحوار أحمد الدهان وهيثم الدهان، قصة وإخراج محمود كامل، وهو إنتاج مشترك بين أفلام مصر العالمية، سينرجي، ونيو سينشري. ومن المقررعرض الفيلم في السينمات يوم 28 من شعر أكتوبر الجاري.