بعد جدل عليه في أولمبياد طوكيو: بطل التجديف السعودي حسين علي رضا وإنجازاته

بعد مشاركته في أولمبياد طوكيو 2021، اللي يعتبر هو أول لاعب تجديف سعودي يشارك في دورة الألعاب الأوليمبية، البطل حسين علي رضا، واحد من أبرز الأسماء الرياضية في المملكة العربية السعودية، وحقق إنجازات محلية وعالمية مختلفة، ويعتبر من رواد رياضة التجديف في بلده، وأشهر لاعبيها، للأسف بعد حصوله على المركز الأخير في سباق في أولمبياد طوكيو اللي بتقام حاليًا، اتعرض للكتير من الانتقادات اللاذعة تحت مسمى الضحك والسخرية، لكن معظم الناس للأسف ماتعرفش عنه الكتير، وماتعرفش تاريخه اللي له تأثير كبير في رياضة التجديف في السعودية، تعالوا نتعرف عليه أكتر ونشجعه.

عن: إرم

انتشر على السوشيال ميديا أخبار بتقول إن اللاعب حصل على المركز الأخير بفارق ساعة ونص عن باقي المتسابقين، وبعدها طبعًا انتشرت ميمز وتريقة و “ده الحمدلله إن هو ماغرقش”.. لكن بعد كل ده، اتضح إنه حصل بالفعل على المركز الأخير في السباق ده لكن بفرق 20 ثانية مش ساعة ونص زيّ اللي تم الترويج له.

حتى بعد ده بيوم، اتأهل حسين لربع نهائي القارب الفردي في التجديف، بعد ما حقق المركز التاني في التصفية الثالثة للترضية، وقدر يثبت كفائته، رغم إن إنجازاته المختلفة من بداية دخوله عالم التجديف كفيلة إنها تقولنا إننا بنتكلم عن بطل.

حسين علي رضا، غير إن هو اللي بيمثل منتخب بلده للتجديف في طوكيو دلوقتي، وده في حد ذاته إنجاز إنه يوصل للأولمبياد، هو قدر يحقق بطولات مختلفة قبل كده، زيّ حصوله على برونزية البطولات الآسيوية للصالات في 2019، وحقق أرقام قوية في دورة الألعاب الآسيوية في 2018، وبطولة آسيا 2019، وحقق لقب بطل المملكة للتجديف داخل الصالات في 2020، حسين بدأ في الرياضة دي من أكتر من تلات سنين، واتقال إنه كان بيحقق إنجازات كتير من قبل حتى وجود اتحاد للتجديف في السعودية، وإنه كان سبب في الاهتمام بتأسيس اتحاد للعبة دي.

حسين علي رضا من السعودية، درس في كامبريدچ و بدأ تجديف من ٣ سنين بس و بلده مكنش فيها اتحاد ل اللعبة أصلاً و مع ذلك اتأهل…

Posted by Ali Alaa on Friday, July 23, 2021

آخر كلمة: ماتفوتوش قراءة: بطل مصر في الأولمبياد وعضو البرلمان ومدرس مساعد في كلية الصيدلة: مين هي هادية حسني؟

تعليقات
Loading...