في أي مناسبة أو احتفال سواء كان عزاء أو فرح أو عيد، بيبقى دايمًا مرتبط بعادات معينة والعادات دي بتختلف من دولة للتانية وساعات بتختلف جوا الدولة الواحدة، يعنى تلاقي عادات الأفراح في المدن غير في القرى، هتلاقيها مختلفة تمامًا، مش بس المدن والقرى، لأ ساعات كمان كل محافظة بيقى ليها طقوس مختلفة، الفرح في أسوان غير الفرح في الشرقية غير في القاهرة.
وعلشان كل الاختلافات دي، حبينا نتكلم عن عادات وطقوس استقبال العيد عند العرب ونبرز اختلاف الثقاقات.
السعودية
بتبدأ مظاهر استقبال العيد في السعودية قبل العيد نفسه، بالنسبة للأكل عندهم أكل موسمي لازم يتاكل في المناسبة دي (المعمول- الكليجة-الكبسة- المرقوق-الهريس)
عادةً بيقوموا الأسر السعودية باستئجار الاستراحات اللي موجودة في المدن أو أطرافها، بتبقى “استراحة” مخصصة عشان تقضي فيها الأسرة كلها اليوم، غير طبعًا لبس العيد والاهتمام بالبيت وزينته.
وبتتعمل في اليوم ده برضه ذبائح وولائم، وبيهنوا بعض بجملة (عساكم من عواده).
فلسطين
أكيد الاحتفال في فلسطين ليه شكل تاني، عندك مثلًا اليوم عندهم بيبدأ بالصلاة في المسجد الأقصى الشريف، وبعد الصلاة بيوزعوا (النقوع والبرزاق) ودي عبارة عن بذور ليها ريحة حلوة، وفي أغاني بيغنيها الأطفال في أخر يوم من شهر رمضان.
وبعد الخروج من المسجد بيروح كتير منهم للمقابر لقراءة القرآن على شهداء فلسطين، وبيوزعوا الكحك والبسكوت على أرواحهم، وبعدها بيروحوا علشان يجهزوا الحلويات الشعبية زيّ ( المعمول- اليحمي- حلي سنونك)
المغرب العربي
يخرج المغاربة اليوم ده لأداء الصلاة وبيرددوا التحية الخاصة بيهم (عواشركم مباركة)، وبيحرصوا على ارتداء الزي التقليدي وقت الصلاة، واللي بيبقى عبارة عن جلباب وطربوش.
أكتر الحلويات اللي بيبقى عليها طلب في المغرب في اليوم ده هي (كعب الغزال)، وعادة عندهم إن أم العريس تهدي العروسة هدية في العيد اسمها (التفكور)، ونقش الحنة على الأيد وإنهم يتبادلوا الحلويات مع بعضهم تعتبر من العادات المهمة عند النساء هناك.
والفطار عندهم اليوم ده بييقى عبارة عن (المسمن- البغرير) مع الشاي المغربي بالنعناع.
اليمن
تختلف مظاهر الاحتفال باليوم ده في اليمن عن الدول الأخرى، اليوم ده بيبقوا مشغولين بجمع الحطب ويعملوه على هيئة أكوام لحرقه ليلة العيد تعبيرًا عن فرحتهم بقدوم العيد.
وأهل القرى بيقيموا الذبائح ويوزعوا اللحوم على الأقارب، وعندهم مجالس للرجالة بيقعدوا فيها طول العيد، غير الزيارات والعيدية، والأكلات اليمنية المعروفة في اليوم ده هي ( السلتة) اللي بتتكون من قطع البطاطا المطبوخة، ورز ولحمة وبيض والحلبة المدقوقة.
مصر
الاحتفال في مصر له أشكال كتير سواء في الأكل أو الأماكن اللي بتتراح، وكل محافظة في الأغلب بيبقى ليها شكل معين في الاحتفال، يعنى عندك مثلًا في القرى بيقضوا العيد في الريف وسط الخضرة، وفي المدن معظمهم بيسافروا المناطق الساحلية زيّ اسكندرية، ومنهم بيقضيه في القاهرة ويقضيها خروج أو يزور الأهل.
أما عن الأكل فالكحك والبسكوت والشاي باللبن والترمس هما الراعي الرسمي لأول يوم عيد الصبح بعد صلاة العيد على طول، غير العيدية اللي بياخدها كبير وصغير لحد دلوقتي. ده غير صلاة العيد اللي تعتبر شيء مقدس عند المصرين وليها احتفال وتجهيز مخصوص غير تجهيزات العيد، مع التكبيرات اللي بنحس بالطمأنينة والسلام لما نسمعها في ميكروفون الجامع “الله أكبر الله أكبر الله أكبر لا إله إلا الله الله أكبر الله أكبر ولله الحمد الله أكبر كبيرا والحمد لله كثيرا وسبحان الله بكرة وأصيلا”