بعد الضجة اللي عملها مسلسل الطاووس في رمضان السنة دي، والجدل اللي حصل بسبب القضية اللي اتكلم عنها واللي كانت ملمسة بشكل كبير مع قضية الفيرمونت، ولإن دايمًا لازم يبقى في أعمال بتفكرنا بقضية الاغتصاب والتحرش، جبنالكم مجموعة من الأعمال الدرامية والأفلام اللي اتكلمت عن القضية.
قضية رأي عام
مسلسل اتعرض ضمن السباق الرمضاني سنة 2007، بطولة يسرا و لقاء الخميسي وسامي العدل، تناول قضية اغتصاب تلات بنات على ايد تلات شباب من اللي ليهم نفوذ وسلطة في البلد، و التلات بنات دول بيتعرضوا للتهديد ونظرة المجتمع السلبية لما يقرروا إنهم يرفعوا قضية عليهم علشان يجيبوا حقهم، بس في النهاية هيتم إعدام الشباب دي كنوع من أنواع انتصار الكرامة. الحلقة الأخيرة حلقة النطق بالحكم عملت ضجة كبيرة في وسائل الإعلام وقت عرضها.
فيلم 678
فيلم بطولة نيللي كريم وناهد السباعي وبشرى، ومن إخراج محمد دياب، اتكلم عن قضية التحرش اللي بيتعرضلها البنات كل يوم في الحياة العامة، رصد قصة تلات بنات من طبقات وأحلام مختلفة وإزاي بيتعاملوا مع أي حدث زيّ ده، الغريب إن المخرج ماستخدمش أي ألفاظ خارجة أو أي إيحاءات جنسية، وده علشان بيقدم رسالة وعمل بعيد عن أي عمل تجاري. اسم الفيلم متاخد من رقم أتوبيس اتعرضت فيه إحدى بطلات الفيلم للتحرش، والفيلم كسب جوايز كتير واتعرض في أكتر من مهرجان.
الخانكة
مسلسل اتعرض ضمن السباق الرمضاني سنة 2016، بطولة غادة عبد الرازق وماجد المصري وفتحي عبد الوهاب، اتكلم عن مدرسة “أميرة” اتعرضت للتحرش على إيد طالب من طلاب المدرسة، ولما حاولت إنها تجيب حقها اتحولت لجاني مش مجني عليه.
حين ميسرة
فيلم إنتاج 2007 بطولة سمية الخشاب وعمرو سعد ومن إخراج خالد يوسف ،فيلم اجتماعى بيتكلم عن القضايا المجتمعية زيّ الفقر والبطالة، واتكلم عن قضية الاغتصاب والتحرش من خلال شخصية سمية الخشاب في المسلسل اللي سابت بيت أهلها بسبب تحرش زوج مامتها، وبعديها وقعت ضحية اغتصاب أبشع منها.
في فيلم عسل اسود برضه ناقش التحرش من منظور تاني، من خلال مشهد واحد بس اتعرضله البطل أحمد حلمي في الأتوبيس مع ادوارد لما رجع مصر.
الاغتصاب والتحرش قضية أخلاقية من الدرجة الأولى، العقوبة الجنائية اللي بتنتهى بالحبس مش كفاية علشان تطلع إنسان سوي للمجتمع، لازم يبقى في جانب من المعالجة النفسية يتلعب عليه، وده اللي يمكن بتقوم به وبتقدمه الأفلام والمسلسلات كنوع أو جزء ولو صغير من التأهيل النفسي، و بتعمل بجانب ده توعية للمجتمع بشكل عام علشان يعرفوا إزاي يتصرفوا ويتعاملوا لو حد من أهلهم اتعرض لحاجة زيّ دي.