إمبارح انتشر خبر تقديم الفنان أحمد حلمي لشخصية الأديب نجيب محفوظ في مسلسل جديد، الكل فرح واتحمس جدًا للفكرة.. وده اللي خلانا نسترجع السير الذاتية اللي تم تقديمها قبل كده من بعض الفنانين والفنانات.. وتقديم أعمال من النوع ده بيبقى صعب ومليان بالتحديات لإن مش الكل بيقبل فكرة تشبيه الممثلين لشخصيات عامة، ففي اللي بينتقد اختيار الفنانات لإنهم بيشوفوا إن مفيش تشابه بالنسبة للشكل، وفي اللي بينتقد القصة والحبكة الدرامية اللي بيشوفوا إنها مابتعكسش حقيقة اللي حصل.. وبالرغم من العقبات اللي بتتحط قدام أعمال السير الذاتية، لكن كتير خد الخطوة دي وخدوا الـ “risk”.. فتعالوا نفتكر بعض الفنانين اللي قدموا أعمال السير الذاتية…
أحمد زكي – فيلم أيام السادات
قدم أحمد زكي قصة حياة الرئيس أنور السادات، وكان في إبداع كبير من حيث الأداء وكمان الشكل اللي قدروا يخلوه زيّ شكل الرئيس الراحل في الحقيقة بالظبط.
تيم حسن – مسلسل الملك فاروق
لما قدم الفنان السوري تيم حسن شخصية الملك فاروق، حصل في الأول غضب من بعض الناس لإنهم شافوا إن المفروض إن ممثل مصري هو اللي يقدمه، بس في الأخر وبسبب أداء تيم للدور بتميز وإتقان.. حب الجمهور العمل جدًا.
منى زكي – السندريلا
قدمت الفنانة منى زكي السيرة الذاتية للفنانة سعاد حسني، ولكن حصل بعض الهجوم من الجمهور وكمان من شقيقة سعاد حسني، ولكن وضحت منى زكي إنها تعبت جدًا علشان تقدم الشخصية بأفضل طريقة ممكنة، وإنها من عشاق الراحلة سعاد حسني فاستمتعت بتقديمها لقصة حياتها.
كارول سماحة – مسلسل الشحرورة
عن: الشرق الأوسط ![]()
عن: Gololy
لما قدمت كارول سماحة شخصية الممثلة والمطربة صباح، كان في إعجاب كبير للشبه اللي قدروا يوصلوله بالميك أب واللبس، لشكل صباح في مراحل عمرها المختلفة.. وكمان وقتها كانت صباح عايشه وده اللي خلى كارول تقدر إنها تسألها عن التفاصيل والمشاعر، علشان تقدم أداء صادق وعاكس لحقيقة الأحداث.
سلاف فواخرجي – مسلسل أسمهان
من مسلسلات السير الذاتية اللي كتير من الجمهور حبها، هو مسلسل أسمهان اللي قدمت فيه الفنانة سلاف أداء متميز وشبيه جدًا للفنانة الراحلة أسمهان.
صفاء سلطان – مسلسل أنا قلبي دليلي
صفاء سلطان اتكلمت عن عشقها لصوت وشخصية ليلى مراد، من قبل ما يتعرض عليها الدور، فلما جالها فرصة تجسيد شخصية الفنانة القديرة ليلى مراد، فرحت بالفرصة دي ومسكت فيها.. واتكلمت عن قد إيه هي استمتعت بكل مشهد هي عملته في العمل.