هي مش عَيلة صغيرة ولا مجرد بنت كيوت. صاحبة الـ 9 سنين بطلة قدرت تعمل حاجة ممكن معظمنا كبالغين مايقدروش يعملوها بسبب الخوف وضغط المجتمع. قدرت تقف ضد متحرش وتفضحه وتقول لأ.
عمرها الصغير مامنعهاش من إنها تبلغ عن المجرم اللي اتحرش بيها. الوعي والثقافة الجنسية اللي أهلها وفروها خلتها واعية بمفهوم التحرش والإساءة الجنسية وخلاها قادرة تحمي نفسها من اللي البنات في مصر بتتعرضله كل يوم وفي كل حتة.
واقعة تحرش جديدة في الساحل الشمالي..والد الطفلة يكشف التفاصيل
واقعة تحرش جديدة في الساحل الشمالي..والد الطفلة يكشف التفاصيل
#عيشها_بإنرجيPosted by NRJ Egypt on Wednesday, August 11, 2021
تفاصيل اللي حصل حكاها والدها اللي رفض يكشف عن هويته وفضل يظهر باسمه الأول بس “عمرو”. الحكاية بدأت لما الأسرة راحت تصيف في واحدة من قُرى الساحل الشمالي، سهرة لطيفة مع أصحاب الأسرة في مجمع كافيهات وسابوا الأولاد يلعبوا في ركن الأطفال.
في ركن الأطفال اتعرضت البنت للتحرش على إيد عامل نظافة في المكان، اللي استغل إنها طفلة وافتكر إنها مش هتتكلم وهتسيبه يعمل اللي هو عايزه علشان مش فاهمة حاجة.
الأب “عمرو” بيحكي: “بنتي كانت بتلعب مع أختها وباقي أصحابهم.. وهو كان موجود، كان بيخليها تقرب علشان تاخد الكرة وكان بيمسكها من ورا.. بنتي افتكرت إنه أول مرة كان مش قصده.. لكن لما كررها تاني قررت إنها تبطل لعب وتحكيلنا”.
البنت كلمت أهلها في التليفون وطلبت منهم يروحوا ياخدوها. في ركن الأطفال حكتلهم كل اللي حصل. “هي حكتلي اللي حصل، وتحفظت عليه أنا وصحابي.. وكلمنا الشرطة في قسم العلمين واتحركوا بسرعة وجُم أخدوا البنت وسمعوا منها التفاصيل كلها وعرفنا إنه عامل النظافة”.
في قسم شرطة العلمين، عملت البنت المحضر وحكت كل التفاصيل وكمان مضت على المحضر باسمها بصفتها الشاكية. “بنتي هي اللي وَقَعِت ومضت.. هي قدمت الشكوى بنفسها بخط إيديها”.
رغم صعوبة الموقف على الأسرة كلها والتعب اللي مروا بيه في الليلة دي إلا إن الموقف اتحول لاحتفال بشجاعة البنت وشطارتها. “من أول ما البنات كان عمرهم 4 سنين.. كانت زوجتي دايمًا بتعلمهم إن في مناطق في الجسم ممنوع الاقتراب منها.. كانت دايمًا تسألهم حد ضايقكم؟ حد قرب منكم؟ لازم ده يحصل معاهم”.
تثقيف أولادكم عن الجنس ومفاهيم زيّ التحرش والإساءة الجنسية ضروري جدًا علشان تحموهم من أي اعتداء ممكن يحصل لهم ويأثر على نضجهم الجنسي والعاطفي. “احنا عندنا بنتين بس.. بنتي اللي حصل معها الموقف هي 9 سنين وأختها أصغر 7 سنين.. دايمًا لازم نسمعهم ونعرف يومهم كان ماشي ازاي.. وإيه الحركات المقصودة وإيه غير المقصودة”.
بالإحصائيات، كم متحرش بالأطفال بيرتكب جرايمه في مصر كل سنة؟
في دراسة عملتها الدكتورة فادية أبو شهبة، الأستاذة في المركز القومي للبحوث الجنائية والاجتماعية، 20 ألف حالة تحرش واغتصاب بتحصل في مصر كل سنة، 85% من الضحايا أطفال.
45% من حالات العنف الجنسي هي حالات اغتصاب كامل، مع إجبار الطفل إنه مايحكيش اللي حصل لأسرته. 20% من الأطفال الضحايا بيتقتلوا بطريقة بشعة.
عمرو، والد البطلة الصغيرة بيوجه رسالة للأهل “المتحرش مش هيقدر يعمل كده في طفل عارف إنه هيفضحه.. عَلِم طفلك ووعيه كويس عن التحرش وازاي يقدر يتصرف علشان يعرف يواجه الموقف ومايتأثرش نفسيًا”.