أيًا كانت طريقتك للاستمتاع بالصيف خصوصًا وسط اجراءات احترازية، لكن مابنقدرش نفوت فرصة إننا نستمتع بالشمس في الصيف، ومعظم الناس بتحب تعمل تان وتاخد لون دهبي، واللي بيكون لون للصيف، وعلشان نتجنب أضرار الشمس والطريقة الغلط للتان اللي ممكن تسبب مشاكل كتير للبشرة أو جفاف للبشرة والشعر، في حاجات لازم ناخد بالنا منها، علشان الموضوع ممكن يوصل لخطر الحروق أو السرطان لاقدر الله، علشان كده لازم ناخد بالنا من كذا نصيحة علشان نتجنب الأضرار دي للبشرة.
احمي نفسك من الشمس
قبل التان، لازم نتأكد إننا بنحمي نفسنا بشكل صح من أشعة الشمس علشان نحمي جلدنا، باستخدام الصن بلوك، اللي هيحمي الجلد من الأشعة الضارة للشمس اللي بتسبب الحروق وفي نفس الوقت مش هيمنع تغير لون الجلد، وضروري يتجدد على البشرة كل ساعتين. كمان علشان تتجنب أشعة الشمس الضارة للعين، والأخطار اللي بيسببها تعرض العصب البصري لأشعة الشمس بشكل مباشر لفترة طويلة، لازم تحمي عينيك من الشمس، استخدم القبعة في تغطية وجهك بعد ما تحصل على التان بدرجة لون انت عايزها، لمدة بسيطة، وتجنب استخدام النضارة الشمس علشان هتعمل فرق في لون الوجه شكله مش هيكون حلو.
خد وقت أطول
كل ما اخدت تان أبطأ وعلى فترة أطول كل ما يستمر اللون لفترة أطول، وخلي بالك لو اتعرضت للشمس بطريقة غلط علشان عايز تاخد اللون أسرع، فتقعد في الشمس لمدة ساعات، فانت كده بتضر بشرتك وبتعرضها للحرق، وكمان اللون هيروح بسرعة، علشان كده، ابتدي مثلًا بربع ساعة، وبعدها زود تندريجيًا 10 دقايق كل يوم.
اختار التوقيت
أطباء الجلدية بينصحوا بتجنب التعرض للشمس بين الساعة 10 الصبح و 4 العصر، لإن في الوقت ده الشمس بتكون أشعتها حادة وبتضر الجلد وتسبب حروق، علشان كده أفضل وقت لعمل التان هو الصبح بدري قبل الساعة 10، أو في الـ golden hour اللي بتكون بعد وقت العصر.
شرب المياه
لازم يكون معاك ازازة مياه جنبك وتفتكر تشرب باستمرار، علشان تتجنب فقدان المياه في جسمك واللي هيتسبب في جفاف، حافظ على ترطيب جسمك بالمياه وانت بتتعرض للشمس، كمان المياه بتساعد البشرة تمتص أشعة الشمس بشكل مفيد للجسم، وبتمنعك من التعرض للحروق.
الحركة المستمرة
لازم ناخد بالنا واحنا بنعمل تان إننا مانكونش معرضين جزء واحد من الجسم للشمس فترة طويلة، وإننا نتحرك بشكل مستمر علشان نتجنب الحصول على درجات مختلفة مش لون واحد للجسم كله، علشان كده لازم نتحرك كل ربع ساعة تقريبًا.
ترطيب البشرة قبل وبعد
الترطيب مهم جدًا قبل وبعد التعرض للشمس، علشان نحصل على تان ناعم وبشرة متناسقة، لإن الجفاف للبشرة بيتسبب في الحصول على لون غير متجانس، لازم نرطب الجسم في الليلة اللي قبل الذهاب للشاطئ.