بسيطة وتلقائية إلى حد الجمال: ليه بنحب عبلة كامل؟

الـ”عبلاوي الأصيل” لقب بيتقال عن محبين ومغرمين عبلة كامل، من وقت ظهورها على الشاشة خطفت قلوب كتير مننا. وحتى وهي غائبة عن الشاشة برضه كانت موجودة بروحها وأعمالها الباقية، بساطتها وعفويتها وضحكتها وتصالحها مع نفسها كل ده وغيره كان سبب في إنها تحتل مكانة ماحدش وصل لها.

مابتجريش ورا التريند

حياة عبلة كامل باب مقفول عليها ولما أخدت قرار إنها تتحجب رفضت إعلان الموضوع ولكنه انتشر عن طريق زوجها الثاني وبعدها انحسرت الأدوار عنها لفترة، وبعدين رجعت بدور مع تامر حسني في سيد العاطفي عشان ينجح الفيلم وتكمل عبلة كامل مسيرتها بالحجاب، ولو أي حد نزل خبر عنها غلط مش بتجري تطلع على الفضائيات وتظهر في مقابلات أو مداخلات لأ بتروح وببساطة للصحفي علشان ينزل تكذيب.

تلقائية وعفوية وبسيطة لحد الجمال

في واحدة من اللقاءات النادرة ليها اتسألت عن استايل لبسها اللي ميزها عن غيرها من فنانات عصرها وقالت : “بلبس معقول.. في حدود المعقول والمناسبة.. بس بشكل عام مش عايشة علشان ألبس” فكانت بسيطة في كل شيء وغير متكلفة حتى ملامحها وشكلها الخارجي.

حاضرة رغم الغياب

طول مسيرتها الفنية كانت بترفض الظهور في لقاءات تلفزيونية لأنها “بتتكسف تتكلم عن نفسها” ويمكن آخر مرة ظهرت فيها في ندوة أقيمت بنادي الصحفيين، بعد مسلسل “لن أعيش في جلباب أبي” وظهرت فيها بعد إلحاح من الناقد طارق الشناوي لكنها اشترطت إنها متتكلمش خالص والفنان نور الشريف هو اللي يجاوب على كل الأسئلة، بس برغم كل ده هي حاضرة رغم الغياب وأعمالها هي اللي بتتكلم عنها.

أدوارها أيقونية

لو بصيت على أدوارها من فاطمة كشري في “لن أعيش في جلباب أبي” لـ”شكران” في “هوانم جاردن سيتي” لـ”سكينة في “ريا وسكينة” و فرنسا في “خالتي فرنسا” و لـ”لبيبة” في “إمرأة في زمن الحب” لـ”جليلة” في حديث الصباح والمساء” كلها أدوار كانت بمثابة سحر ليها ولينا، تركت فيهم بصمة وإيفيهات وتقائية وأداء استثنائي وهي سايبة إيدها.

شبهنا في كل حاجة

في جملة لعبلة كامل بتقول فيها ” احنا أولاد الطمي والصلصال وكراريس الرسم” اهتمامتها في طفولتها أثرت في شخصيتها اتربت زي كتير مننا وزي كتر من عائلاتنا، تحسها واحدة مننا بسيطة وغير متكلفة شبه والدتك أو أختك، ماتحسهاش غريبة عنك وحتى ده قدرت تقدمه في أدوراها.

آخر كلمة: ماتفوتوش قراءة: الكاتبة غادة عبد العال: عن حواديت قطفتها ونسجتها في عمل فني