بسبب الكورونا، تمرازا عملت عرض أزياء أونلاين في مصر..
بواسطة فرح أشرف.
كلنا لاحظنا في السنين الأخيرة إن مصر ومصممين الأزياء المصريين داخلين على الشهرة والعالمية من أوسع ابوابها، وده سبب رئيسي وراه هو إن عالم الفاشون في مصر اختلف واتطور تمامًا عن زمان، بشكل يسمح للمبدعين يخلقوا حاجات جديدة وجريئة أكتر، ومن بيوت الأزياء اللي كبرت في مصر كنتيجة عن البيئة دي وبعدها قدرت توصل للعالمية كانت براند تمرازا أو “Temraza”.
تمرازا معروفين بتصاميمهم الأنيقة والراقية اللي بتعمل على تعزيز ثقة المرأة بنفسها واطراء جمالها عن طريق استخدام تفاصيل براقة من خلال الإلهام من مجموعة كبيرة من الثقافات المختلفة. ورا نجاح تمراز قصة كفاح مصرية أصيلة بطلتها هيّ فريدة تمراز اللي قدرت تؤسس علامة تجارية عالمية مشهورة بمنتجات فاخرة مصنعة من أجود الخامات والمطرزات.
ظهرت Temraza لأول مرة في مجموعتها في خريف/ شتاء 2014 خلال أسبوع الموضة في باريس، وفدرت تحصل على الجائزة الأولى في تلفزيون الأزياء اللي وصل البراند لشهرة عالمية في وقت قليل. و من وقتها العلامة التجارية بقت معروفة عالميًا، وكتير من مشاهير هوليوود وكبار الشخصيات الدولية على السجادة الحمراء شفناهم لابسين من تمرازا في حفل توزيع جوائز الأكاديمية (الأوسكار)، والجراميز (Grammys)، وبرايم تايم (Primetime)، ومهرجان كان السينمائي ومهرجانات عالمية كتير؛ و ده إدى مصداقية للبراند وشهرة واسعة.
ودلوقتي زي ما تمرازا خدت خطوة كبيرة زمان ودخلت مجال الفاشون العالمي كمان هتكون أول براند مصري يعمل عرض أزياء أونلاين؛ وده هيحصل عن طريق التعاون مع مصمم المجوهرات العالمي جيما أزورو “Gemma Azzurro”.
![](https://ar.scoopempire.com/wp-content/uploads/sites/4/2020/07/3-2-1.jpg)
عرض الأزياء كان يوم 20 يوليو وده كان أول عرض أزياء مصري بالطريقة دي على الإطلاق.
الكوليكشن الجديد اتعرض تحت اسم “Basics” ضم قطع كتير زيّ فساتين وتنانير وتيشرتات وجاكتات. المجموعة دي بتتميز بالأناقة والعصرية كمان فريدة اشتغلت علي الكوليكشن ده لسنين كتيرة عشان كده عالم الفاشون متحمس جدًا ليه.
بالإضافة لده المجموعة هتكون بأسعار كويسة مقارنة بالبراندات العالمية وفي متناول المعجبين؛ الأسعار هتتراوح مابين 1440 لـ 4000 جنية مصري.