الشباشب على مدار السنين اللي فاتت أتغير شكلها ومكانتها في المجتمع وبقيت مختلفة وراحت هيبتها، صحينا الصبح لقينا الشبشب الزنوبة بقى يتقال عليه “سليبرز” وطلعه له تقاليع وفضلوا يلعبوا في هويته لحد ما بقى “كروكس”، بس مهما أتغيرت الأسماء أو الأشكال هيفضل الشبشب أبو وردة والزنوبة له مكانة خاصة في قلوبنا ومرتبط معانا بذكريات معلمة علينا في كل حتة.
وبمناسبة اليوم العالمي للشبشب.. أه في يوم عالمي للشباشب إيه المشكلة؟ بالمناسبة اللي مش هتتكرر كتير دي، جمعنا لكم استخدامات مختلفة وغير تقليدية نستغل بها الشبشب غير إننا نلبسه.
سلاح لكل أم عربية
سلاح ثلاثي الأبعاد ممكن يجيلك من أي حتة، يخبطك ماتحوطش منطق لو في يوم زعلت ست الكل، كلنا بلا استثناء عدى علينا الشبشب ده، سواء كان وسيلة تهديد أو في خلال المناوشات اليومية. وده بيتطلب مهارات معينة من الأم في التصويب في المكان الصح بدل ما ييجي في النيش والخسارة تبقى خسارتين. ومن ضمن مميزاته برضه إنه مابيعلمش ولا بيعمل جروح خطيرة، فاحنا كده في الأمان.
بديل آمن للبيروسول
من الاستخدامات الغير تقليدية واللي مافيش غنى عنها هو إنه قاتل للحشرات الزاحفة والطائرة والصراصير؛ بديل آمن للبيروسول على صحتنا وصحة أطفالنا.
بيمنع الحسد ويجيب الرزق
وأنا بدور على استخداماته الغير تقليدية، لقيت حاجة غريبة وكان أول مرة اسمع عنها، وهي إنهم بيحطوه على أبواب المحلات والبيوت كنوع من أنواع جلب الحظ والرزق، وفي الحقيقة أنا مش عارفة التقليعة دي جات منين، مع إن المفروض إن ده نفس الشبشب اللي قالوا عليه إن لما بيبقى مقلوب بيجيب المشاكل والخناقات في كل بيت.
بديل للجون
لو اتزنقت في كورة وعليك دورة رمضانية مع الفريق اللي في الشارع اللي جنبك، الشبشب هو نجدتك الأولى، وتقدر كمان تستخدمه في إنه يقف جون لو مفيش حارس مرمى.
بديل لسكينة المعجون
في حاجة في النقاشة اسمها “سوكة” بتبقى مكان في الحيطة زاوية قائمة مع كمر، وسكينة المعجون مش بتعرف تجيبها؛ فبيستخدموا الشبشب علشان مرن وقابل للتني.
بننجز به مهمات
لو حاجة عالية ومش طايلها ممكن ترفع إيدك بالشبشب وتزقها به وتقوم واقعة عنده بكل سهولة، أو لو حاجة مزنوقة في الجوانب وإيدك ماتقدرش توصل لها. ونفس الكلام للولاد اللي بتلعب كورة، لو أتعلقت منهم فوق الشجرة بيقوم جايبها برمية لولبية للشبشب، بس خلي بالك إن ممكن الشبشب يتعلق هو كمان مع الكورة وتبقى محتاجة إغاثة عاجلة.
تجديد البيت
ممكن نتسخدمه في تغيير ديكور البيت، زيّ إنك تعمل بها يافطة ترحب بها للناس اللي جاية تزورك وتخليهم مايهوبوش ناحية شقتك تاني، تجيب أكتر من شبشب بوردة بس شكلهم فرايحي وتربطهم ببعض بشريط سلوفان، وممكن نستخدمه بديل للورد ونعمل منه برواز داير ما يدور.