في زيارة تاريخية، أصحاب السمو الملكي الأمير تشارلز وزوجته الدوقة كاميلا زاروا مصر في أول جولة خارجية ليهم بعد وباء كورونا، في زيارة مدتها يومين تنقلوا فيها في أهم معالم القاهرة والأسكندرية، وسعدوا بلقاءات مختلفة قاموا بيها وتجارب جديدة شافوها في مصر، بعد ما قضوا اليوم الاول في القاهرة واليوم الثاني في الأسكندرية، تعالوا نعرف تفاصيل الزيارة والتجارب المختلفة اللي قاموا بيها.
“لحظة استثنائية بأعظم مواقع التاريخ” بالجملة دي علقت سفارة بريطانيا على صور الأمير تشارلز والدوقة كاميلا في الأهرامات.
في اليوم الأول، الأمير تشارلز التقى بالبابا تواضروس الثاني رئيس الكنيسة القبطية الأرثوذكسية في مصر، واتناقشوا في دور الدين في قضية المناخ، اللي بيهتم بيها الأمير بشكل خاص، كمان ناقشوا قضايا العنف ضد المرأة، وإزاي يتم معالجتها،
واحتفل الأمير بمساهمة مشروع مصر تحت إدارة شركة flat6labs والممول من المملكة المتحدة في التمكين الاقتصادي للمرأة ومكافحة العنف ضدها، وكمان التقى بالشركات اللي بتقودها سيدات وتلقت دعم مالي وتقني من المشروع ده، وتابع الإنجازات اللي بتتحقق فيه. وفي نفس المجال، الدوقة كاميلا زارت عزبة خيرالله واتعرفت على المشاريع اللي بتتعمل هناك من ستات، وقالت عنهم الدوقة إنهم ملهمات.
الدوقة قامت بزيارة مستشفى بروك البيطري، اللي بتشغل منصب رئاستها في جميع أنحاء العالم، وتابعت أحوال المستشفى وعلاج الحيوانات فيها، مستشفى بروك تعتبر أقدم وأشهر مستشفى لعلاج الحيوانات في القاهرة، الدوقة كاميلا أبدت إعجابها بالمستشفى وآليه العمل فيها، وتفقدت أقسام المستشفى واتكلمت مع المسؤولين فيها والأطباء.
وفي اليوم الثاني من الزيارة، انتقلوا أصحاب السمو الملكي للأسكندرية، وزاروا مركز الجيزويت الثقافي ، واطلعوا على تاريخه ودوره الديني والمجتمعي، وقاموا بجولة في معرض فني لشخصيات إسكندرانية مشهورة، صممه لاجئين سودانيين شباب.
وقبل العودة للمملكة، الأمير تشارلز والدوقة كاميلا زاروا واحدة من أهم معالم الأسكندرية، وهي مكتبة الأسكندرية، وقاموا بجولة اصطحبهم فيها مدير المكتبة الدكتور مصطفى الفقي، وأهداهم كتاب عن تاريخ الحضارة المصرية. وفي الجولة دي، اطلعوا على بعض الآثار والمخطوطات الموجودة في المكتبة.
