بالصور: عدسة أنس كمال ومحاجر الجير في صعيد مصر
للأسف لكتير من المصريين مصر محصورة في كل ما هو بين التجمع وزايد، آه..بنسمع عن أماكن كتير حلوة، لكن اللي سمع غير اللي شاف، مصر وجمالها أكبر بكتير من العاصمة، وبعيدا ً عن السفر للمصايف في الساحل، أو المشاتي في جنوب سيناء والبحر الأحمر، كتير من محافظات مصر سواء في الوجه البحري أو القبلي مليانة كنوز مغمورة محدش يعرف عنها شيء.
من أكتر الأماكن اللي جمالها مظلوم في مصر هي الصعيد، من المزارات الفرعونية في بني سويف والمنيا لمساحات خضراء مهولة من الريف ممتدة مع النيل من قنا لأسيوط، لكن المصور المصري أنس كمال قرر ياخدنا بعدسة الكاميرا بتاعته لمكان تاني بعيد عن إرثنا الفرعوني وريفنا البلدي.
“الجبل الأبيض”، ده كان إسم المشروع اللي أنس اشتغل عليه وفيه صوّر عمال محاجر الجير في محافظة المنيا، وسلط الضوء على معاناتهم في صور خرافية تكاد تكون من عالم تاني. هنا في جبل الجير الأبيض العمال بيصحوا من الفجر ويقضوا يومهم بيستخرجوا أطنان حجارة كل يوم. اللون الأبيض هو العنصر المسيطر في كل الصور، والجبل ملازم للخلفية مفيش شيء بيكسر جموده غير إبتسامات العمال للكاميرا.
المكان جميل بشكل متتصوروش عين، لكن بالرغم من جماله وجمال الصور، كتير من العمال عرضة لكتير من أمراض الجهاز التنفسي بسبب سوء إجراءات السلامة.
