الكل بيقول علي سوسن بدر انها “هاربه من المتحف” لملامحها المصرية الأصيلة اللي بتشبه التماثيل والمنحوتات الفرعونية، وبالرغم من إنه مفيش شك في ده، جلسة التصوير الجديدة اللي ظهرت فيها بدر لمجلة “ELLE ARABIA” كانت بمثابة مفاجأه لكل الناس من كم الشبه اللي بين الفنانة المصرية و الفراعنة زمان.
الجلسة كانت مليانة بالإبداع من أول فكرتها لحد التنفيذ، وعلشان كده هنلاقي في كتير من الصور سوسن بتقلد صور بعينها للفراعنه، والنتيجة كانت مذهلة زي ما إنتوا شايفين. وكالعادة لقت جلسة التصوير الغالب عليها الطابع الفرعوني ردود أفعال إيجابية كتيرة، معظمها بيتكلم عن مدي جمال سوسن بدر، و إن إزاي ملامحها الشرقية مثال للجمال، وإنها زي “الذهب” كل ما يمر عليه الزمن، قيمته و جماله بيزيدوا.
و دي ماكنتش أول مرة تستغل الممثلة القديرة جمالها الشرقي، فاحنا شفناها قبل ده في كذا جلسة تصوير كانت بردو بتسلط الضوء علي شكلها (وجملها) الفرعوني زي جلسة التصوير اللي عملتها من فترة مش كبيرة مع مجلة “Harpers Bazaar Arabia“، بالإضافة لمعجبيها اللي جمعوا بين صور المثلة المصرية، وصور لملكات من زمن الفراعنة زي حتشبسوت و نيفرتيتي. ومن الواضح أن سوسن بدر بتحب وتقدر النوع ده من التعبير عن الحب، لأنها بتنشر الصور دي علي حسابها الخاص علي الإنستاجرام و بتشكر متابعينها عليهم.