بالصور: بدو سيناء وفن الكمامات المطرزة
في مدينة العريش في محافظة شمال سيناء بمصر، مجموعة من السيدات البدويات في استجابة لأزمة فيروس الكورونا المستجد بدأوا يصمموا كمامات على الطراز البدوي المعروف بألوانه الجميلة وأشكاله الهندسية.
كتير من البيوت دي مفتوحة على أساس الدخل الجاي من السياحة، ولكن مع وقف حركة السفر ومنع التنقل بين المحافظات بسبب الحظر الصحي الجاري تطبيقه، كتير من الأُسر دي بدأت تتأثرر ماديًا بسبب الوباء، ولكن لحسن الحظ كتير من السيدات دول بدأوا يفكروا برا الصندوق يستغلوا موهبتهم في التطريز بشكل تاني؛ وبدل ما يشتغلوا على الحظاظات والـ bracelets واللبس البدوي بقوا يشتغلوا على كمامات جديدة بنكهة سيناوية بدوية.
التطريز في سيناء هي حرفة بيتم توارثها بين الأجيال من الأم للبنت، وفي الغالب البنات بيتعلموها من سن صغير عشان يقدروا يساهموا بنوع من أنواع الدخل للبيت.
منظمة الفيروز في العريش بقالها فترة شغالة على الموضوع ده، وعشان كدا شغلوا عندهم أكتر من 550 سيدة بدوية على المشروع ده. الكمامات دي معمولة من طبقتين، الطبقة الأولى الداخلية معمولة من فلاتر طبية، أما الطبقة الخارجية فهي اللي عليها التصميم البدوي.
الكمامات دي بعد ما بتخلص بتتغسل و تتغلف وتتشحن لمراكز توزيع في القاهرة الكبرى وكمان بتتباع أونلاين على جوميا بسعر بيوصل لـ 40 جنية للواحدة. تصميم الكمامة الواحدة ممكن يقعد لحد يومين عشان السيدات دي بياخدوا وقتهم في إنهم يتقنوا التصميم بشكل يتناسب مع الفن البدوي.