بعد الزلزال المدمر اللي ضرب المنطقة الحدودية بين تركيا وسوريا، وخلف آثار دمار وضحايا كتير، حصل انهيار وتشقق بطول 6 متر يوم الاتنين اللي فات، في واحد من أرصفة كورنيش مدينة الإسكندرية بمصر، وامبارح السبت، حصلت حادثة مشابهة في محافظة مطروح بطول 30 متر.
ناس كتير على منصات التواصل الاجتماعي أرجعت الانهيار الأرضي اللي حصل في كورنيش مدينة الإسكندرية ومدينة السلوم للزلزال اللي حصل في سوريا وتركيا، بالذات إن سكان الإسكندرية لاحظوا تآكل جزء من شاطئ إدوارد خراط، وظهور تشققات وميل في سور الكورنيش بطول 20 متر بسبب الهبوط الأرضي.
وضح اللواء محمد الشريف، محافظة الإسكندرية، إن أسباب انهيار رصيف كورنيش الإسكندرية في منطقة سيدي بشر، كان نتيجة ارتفاع الموج بشكل مش عادي بسبب موجة من الطقس السيئ اللي اتعرضت لها المحافظة، وأكد الشريف إن مافيش أي علاقة بين الزلزال واللي حصل في كورنيش الإسكندرية.
أما الدكتور أيمن الجمل رئيس معهد بحوث الشواطئ في الإسكندرية، فأكد إن الزلزال اللي حصل في تركيا وسوريا كان زلزال أرضي مش بحري، ولو حصل في البحر فمش هيحصل تسونامي بسبب بعد المسافة، ووضح إن مشكلة الهبوط مالهاش علاقة بالزلزال، وقال إن لو كان في أي علاقة بين الهبوط والزلزال كان هيحصل التصدع بطول ساحل الكورنيش.
أسباب انهيار كورنيش الإسكندرية
بيفسر الجمل اللي حصل كنتيجة لمشروع حماية شاطئ الإسكندرية من النحر، وقال إنه اتعمل كذا لسان صناعي لنقل الصخور اللي هتتحط في الحاجز على عربيات، لإن تكلفة النقل بالطريقة دي أرخص من النقل على مراكب.
ووضح الجمل إن اللسان الصناعي اللي اشتغلت عليه الشركة، حجب الرمل من الوصول للشاطئ طول أشهر الصيف، وبسبب تعرض الشواطئ للنحر في الشتا استمر النحر من غير ما يحصل تعويض للرمل، وعلشان كده وصلت المياه تحت الرصيف واتسرب الرمل من المنطقة دي فحصل التصدع.
بيقول الجمل: “أي شاطئ نحر في الصيف بتزيد الرملة بتعوض الفاقد وفي الشتا بيحصل نحر، وبسبب وجود اللسان كحاجز محصلش تعويض للرمال وده وصل الوضع على ما هو عليه”.
وأشرف الدكتور أيمن الجمل على تصليح اللي حصل وملء الفجوات تحت الرصيف، وتم افتتاح المكان مرة تانية للمارة كحل مؤقت لحد ما الشركة المنفذة تخلص مشروعها وتشيل الممر الصناعي ويرجع الشاطئ زي ما كان.
انهيار كورنيش السلوم
بعد حصول الانهيار، بدأت محافظة الإسكندرية إصلاح الرصيف بشكل سريع، وخلال وقت قياسي رجعت حركة المواطنين بشكل طبيعي عليه، على حسب تصريح اللواء محمد الشريف.
أما بخصوص كورنيش مطروح، فحصل الانهيار على نفس خط الساحل الشمالي من سيدي بشر في الإسكندرية للسلوم في مطروح، وكانت الحادثة بعد 6 أيام بالظبط من زلزال سوريا وتركيا، وكان الانهيار اللي حصل في كورنيش السلوم بطول 30 متر في وسط المدينة، وعلشان كده ربط الناس بين الحادثة دي والزلزال الأخير في سوريا وتركيا.
وضحت وزارة التنمية المحلية إن أسباب انهيار كورنيش مطروح ترجع لسوء الأحوال الجوية وسقوط أمطار غزيرة لمدة 12 ساعة متتالية، وده اللي سبب انهيار الرصيف وسقوط واحدة من عمدان النور اللي بتشتغل بالطاقة الشمسية.