برغم إن فيلم ريش أخد الجائزة الكبرى لأسبوع النقاد في مهرجان كان السينمائي، وهي أول جائزة يحصل عليها فيلم مصري طويل في تاريخ المهرجان كله وكانت ردود الأفعال عليه إيجابية برا مصر، بس بعد عرض الفيلم في مصر حصل عكس المتوقع، وبعد أول ساعة في الفيلم بدأ الجمهور والفنانين في الانسحاب من صالة العرض.. طب إيه السبب؟
يسرا وشريف منير وأشرف عبد الباقي والمخرج عمر عبد العزيز كانوا من أبرز الفنانين اللي انسحبوا من دور العرض، وده بعد ما قالوا إن الفيلم بيسيء لمصر بدرجة كبيرة، وفي تصريحات شريف منير مع عمر أديب قال إن الفيلم عايز يوصل رسالة مش صحيحة عن العيشة في مصر، في حين إن الرئيس عبد الفتاح السيسي بيعمل مبادرات لتحسين الأوضاع المعيشية ومنهم مبادرة حياة كريمة وتكافل وكرامة، وقال إنه مش فاهم رؤية الفيلم أو الرسالة اللي عاوز يوصلها، وإيه السبب إنهم يظهروا العيشة في مصر على إنها بالقسوة والعذاب ده؟ في حين إن الدولة بتاخد خطوات إيجابية ومؤثرة على كل المستويات. وأضاف شريف منير إن حصول الفيلم على جائزة في مهرجان كان مش هيعفيه من الانتقادات.
وعلى عكس رأي شريف منير، علق الناقد السينمائي طارق الشناوي وقال إن الفيلم جيد جدًا وإن مش مجموعة المشاهد دي هي اللي هتختزل صورة الوطن، وإن لغة الفيلم ماوصلتش للجمهور ومن الصعب إن فيلم يرضي الجمهور والنقاد مع بعض.
في حين إن منتج الفيلم محمد حفظي علق على الانتقادات وقال إن الفيلم مفيهوش أي إسقاطات سياسية ولا نقدر نعتبره فيلم وثائقي بيحكي عن معاناة عمال المصانع أو الطبقة العاملة، هو ولا واحد من دول، هو عبارة عن عالم خيالي من إبداع المخرج عمر الزهيري واللي خلق عالم خاص له أبجدياته الخاصة بما فيها من موسيقى وألوان خلت الفيلم وكإنه بيطرح قضية فنية أكتر منها مجتمعية.
مانقدرش ننكر إن الفيلم على المستوى الفني جيد وإلا ماكانش استحق جائزة من أهم مهرجانات العالم، بغض النظر عن الرسالة اللي عايز يوصل لها، بس أحيانًا الفيلم المختلف ممكن يكون مربك لبعض الناس ومن أولهم الجمهور، بس في النهاية الفيلم مصري وكان بيمثل مصر قدام العالم، ويمكن ده اللي ضايق الجمهور لإنهم حسوا بالغيرة على بلدهم أو إنها تظهر بأي شكل يسيء لها، حتى لو ده ماكانش قصد المخرج ولا دي الرسالة اللي عايز يقدمها.