أخبار مقتل صيدلي مصري بإلقاءه من شباك شقته في منطقة حلوان جنوبي القاهرة أثارت تعاطف كبير على السوشيال ميديا المصرية خلال الساعات الماضية، وانتشر هاشتاج #حق_ولاء_لازم_يجي.
اتوجهت الشكوك ناحية زوجة الضحية وأخواتها ووالدها، اللي تم اتهامهم بإلقاءه من شباك شقته في الدور الخامس، بالذات بعد ما وضحت وسائل الإعلام المصرية إن الصيدلي “ولاء سعيد زايد” اللي كان بيشتغل في المملكة العربية السعودية، كان اتجوز من واحدة تانية، وأصرت زوجته الأولى على الانفصال لكنه رفض تطليقها.
مازالت السلطات الأمنية بتحقق في حادث وفاة زايد، بعد وصول معلومات أولية بإن سبب الوفاة هو دفعه من شباك شقته، ووضحت التحريات الأولية إن الحادثة بدأت بوصول الزوجة الأولى وأخواتها ووالدها ومعاهم تلاتة تانيين، يوم التلات 27 سبتمبر الماضي، لشقة الضحية علشان يحلوا الخلافات اللي بينه وبين زوجته، لكن الموضوع أتطور ووصل للتعدي عليه بالضرب وإهانته قدام ابنه اللي عنده سبع سنين، علشان يجبروه يطلق زوجته ويمضي على إيصالات أمانة.
اتفاجئ أهالي العمارة والمشاة في الشارع بسقوط الصيدلي من شباك شقته ونزيفه الحاد على الأرض لحد ما مات في مكانه، وبدأت تحقيقات السلطات مع 7 مشتبه فيهم، بعد اتهام أهل الضحية لأسرة زوجته الأولى اللي بتأكد حاليًا إن الصيدلي هو اللي رمى نفسه من الشباك.
المتهمين الحاليين هما؛ زوجته، ووالدها، وشقيقاها وتلاتة من أصدقائهم، والتهم الموجهة لهم هي؛ استعراض القوة، والتلويح بالعنف، والتهديد بهم، واستخدامهم ضد المجني عليه بقصد ترويعه وتخويفه بإلحاق الأذى به، والتأثير في إرادته.
“أونكل رمى بابا من البلكونة”.. نجل صيدلي حلوان يفجر مفاجأة ومحامي الضحية يكشف التفاصيل
“أونكل رمى بابا من البلكونة”.. نجل صيدلي حلوان يفجر مفاجأة ومحامي الضحية يكشف التفاصيل
Posted by المصري اليوم on Tuesday, September 27, 2022
أشارت التحريات إن في يوم الحادثة بعت الضحية رسالة لأخته بيطلب حضورها علشان تساعده بعد وصول المتهمين لشقته علشان يجبروه على تطليقها وتطليق زوجته التانية. نقلت الأخت طلب المساعدة لوالدة الضحية اللي نقلتها بدورها لبواب العمارة اللي فيها شقة الضحية.
طلع البواب مع واحد من الجيران علشان يفهموا إيه اللي بيحصل، واتقالهم إن في خلافات عائلية بين الصيدلي الضحية وأهل زوجته الأولى وبيحاولوا يحلوها، وبعد كده اتفاجئ البواب والجار بوقوع الضحية من الشباك ميت.
لقيت التحريات رسالة على تليفون الزوجة المتهمة من والدتها بتطلب فيها من بنتها تصور الضحية أثناء التعدي عليه واهانته، ولقوا كمان رسالة على تليفون واحد من المتهمين فيه محادثة بينه وبين متهم تاني بيطلب فيها المساعدة إذا حصلت خناقة مع الضحية.