تابعنا من كام يوم حادثة شغلت الرأي العام في مصر، والسوشيال ميديا كانت الوسيلة الأساسية في وصول الموضوع للجهات المختصة، وعلى الأساس ده، أطلقوا هاشتاج “فين نورا”. طب إيه قصة نورا، وإيه اللي حصل معاها، والموضوع وصل لفين؟
نداء على السوشيال ميديا لإنقاذ نورا
الموضوع بدأ بهاشتاج “فين نورا”، اللي بيستنجدوا فيه إن في أب خطف بنته وبيعذبها بسبب وصية سابها جدها بيقول فيها إن تلت الميراث يروح لها.. طب إيه اللي وصل الموضوع للدرجة دي؟
الموضوع بدأ مع الأب “علي عصام” اللي أتجوز من سيدة عندها جنسيتين؛ روسي وأوكراني، وخلفوا بنتهم نورا، بس بعد شهور من ولادتها وقعت خلاقات بين الأب والأم وانتهت بالطلاق، فقرر الأب إنه يسيب البنت اللي عمرها شهور عند والده علشان تتربى في مصر معاه ومع مراته وأداهم هما الحضانة، جدها اتكفل بها وبراعيتها، خصوصًا بعد ما سافر الأب تاني بمجرد جوازه.
وبعد سنين، وبالتحديد من 8 شهور، أتوفى جد نورا سندها وضهرها، ورجع الأب وظهر تاني على الساحة وبيطالب إنه ياخد الورث اللي سابه الجد لنورا، خصوصًا إن ورثها كان أكبر منه هو شخصيًا.
ولما رفضت إنها تروح معاه، بدأ يعنفها بالضرب وخطفها من زوجة جدها اللي عمرها فوق ال80 سنة، ونزل بها في الشارع من غير حتى ما تاخد معاها أي حاجة. وعلى لسان شهود وبوست حكى اللي حصل بالتفصيل، قالوا إنهم راحوا علشان يبلغوا قسم المعادي بس ماحققش في القضية، وقال إن هي لازم تييجي بنفسها علشان تبلغ عن الحادثة، مع العلم إن نور كسبت قضيتين قبل كده ضد والدها يعني مش من حقه إنه يجبرها على حاجة.
قوة السوشيال ميديا
اللي خلى نور ترجع لحضن زوجة جدها، اللي هي بالنسبة لها زيّ جدتها، هو بوست على السوشيال ميديا جيه بالتزامن مع البلاغ اللي قدمته زوجة الجد، وبعدها قررت النيابة العامة إنها تتحرك في الموضوع بسرعة، وفعلًا نزلت بيان بتشرح فيه تداعيات القضية، وشهادة الشهود اللي أكدوا إن الأب خطفها قدام أفراد الأمن اللي مسئولين عن حراسة واحد من العقارات اللي جنب المسكن. والنيابة أخدت شهادتها، وقالت نورا إنه اتعدى عليها بالضرب وسرق موبايلها وحبسها في أوضة في بيته وإنها حاولت تهرب بس ماكانش فيه فايدة، ولاحظوا آثار ضرب وكدمات في عينها بس والدها أنكر كل ده، وعلى أساس ده قررت النيابة العامة إنها تحجز المتهم بديوان القسم وأمروا بعرض البنت على مصلحة الطب الشرعي، وده كان وفقًا لبيان يوم الاتنين.
القضية وصلت لفين في الساعات الأخيرة؟
امبارح النيابة أمرت بحبس المتهم بخطف نورا احتياطيًا على ذمة التحقيقات لمدة أربع أيام، بعد ما أثبتت تحريات الشرطة إنه فعلًا اتعدى على بنته وأجبرها إنها تروح معاه لبيته، بالإضافة إنها أمرت بتفريغ كل الكاميرات الموجودة بمكان الواقعة ولسه التحقيقات شغالة.
مداخلتها مع لميس الحديدي
نورا عملت مداخلة هاتفية مع لميس الحديدي بعد ما رجعت تاني على بيتها، وقالت فيها عن أسوأ ذكرى لها مع والدها؛ لما شافته وهو بيضرب جدها، وكملت “جدي ومراته هما بابا وماما بالنسبة ليا، والدي خطفني واعتدى على زوجة جدي وماكنتش باكل في بيته.. خايفة يكون حاططلي حاجة في الأكل. وأنا فضلت من يوم 4 يونيو حتى 13 يونيو مخطوفة وماكنش بيتعامل معايا ومراته كانت بتجبلي أكل.”
بنقدم كل الدعم والحب لنورا وبنتمى لها حياة مليانة حب وسعادة وأمان.