الفترة اللي فاتت كل جماهير الكورة سواء من مشجعين أرسنال أو جمهور الكورة عمومًا جوه وبره مصر كانت بتتكلم عن محمد النني لاعب نادي آرسنال الإنجليزي والمنتخب المصري، وعن إن أدائه تطور وبقى مؤثر في المبارايات اللي بيلعبها الفترة دي، وده خلى مدرب الفريق ميكيل أرتيتا يعتمد عليه ويثق فيه بشكل كبير.
وكمان تصدر النني المجلات والجرايد في انجلترا، وقالت صحيفة “ديلي تيلجراف” البريطانية إن النني منح آرسنال التقل اللي كان ناقص الفريق لفترة كبيرة، وإنه تحكم في الكرة بشكل كويس جدًا، وإن أدائه كان ثابت في الماتشات اللي لعبها.
وفي مباراة آرسنال أمام نادي دوندالك الأيرلندي ببطولة الدوري الأوروبي، شارك النني في المباراة كلها ولبس شارة الكابتن في الدقيقة الـ 74 بعد خروج زميله جرانيت تشاكا، ودي حاجة خلتنا كلنا فخورين بيه.
ولكن دي ماكانتش أول مرة لاعب دولي مصري يلبس شارة الكابتن، فمجدي طلبة هو أول لاعب مصري يلبس شارة الفريق في باوك ثيسالونيكي اليوناني سنة 1992، وبعده لبس عبد الظاهر السقا شارة الكابتن مع فريق جنتشلربيرليجي التركي سنة 2008، وكمان أحمد المحمدي لبس شارة القيادة مع فريق أستون فيلا في الدوري الإنجليزي الممتاز، ولبس علي غزال برضو شارة الفريق مع ناسيونال ماديرا في الدوري البرتغالي في سنة 2015، ومحمود حسن تريزيجيه لبس الشارة مع نادي قاسم باشا التركي في أخر موسم 2018-2019.