بعد حلقته في برنامج صاحبة السعادة مع الفنانة إسعاد يونس، واللي هتمتد للأسبوع الجاي كمان، الكينج محمد منير حديث السوشيال ميديا دلوقتي، وبألبومه الجديد كمان، وده خلانا نركز على الأغاني اللي قدمها منير باللغة النوبية، اللي تعتبر مش معروفة أوي بالنسبة للمصريين، ولولا الكينج كنا هنبقى لسه مش عارفينها، لإنه زيّ ما بيتقال عليه، سفير موسيقى النيل، وأكتر فنان بيعبر عن التراث النوبي، فتعالوا نشوف إيه الأغاني دي وإزاي لقت نجاح مع الجمهور رغم إنها تبان في البداية إنها مش مفهومة، لكن بالسحر الخاص للكينج، الناس دورت على معانيها علشان تكون فاهمة بتسمع إيه.
اللي تعتبر من أشهر الأغاني النوبية للكينج، أغنية نيجري بيه اللي عملها منير في 2008، وكانت كلمات وألحان أحمد منيب، وبتوصف الأغنية مشهد منير وهو بيسأل البنت اللي عدت قدامه بسرعة وهي بتلقي نظرة خاطفة، علشان من المعروف في بلاد النوبة، إن البنت لو عدت قدام حبيبها وهو واقف مع ناس، بتعدي بسرعة احترامًا ليه، وهي ماسكة طرف فستانها، وده المشهد اللي بتلخصه كلمة “بشكوسا”.
بنغنيها من زمان، ومن أول ظهور الكوميكس على النت من قبل 2012 كمان وفيه كوميكس كتير بتوثق إننا كنا بنحب الأغنية وبنغنيها حتى وإحنا مش عارفين معناها ومش فاهمين نص الكلمات اللي جواها، وطلعت إيه هي الشمندورة؟ طلعت المركب الصغيرة اللي واقفة في وسط البحر والقوارب بتتدلع لما تكون واقفة جنبها وترفرف شراعها.
من أخف أغاني الكينج ولحنها يثبت في دماغك وتغنيها حتى لو انت مش فاهم الكلمات، سية ده طائر، وبيقصد بيه حبيبته وإنه شايفها قدامه.
من ألبوم أحمر شفايف، محمد منير بيقول لحبيبته الحنينة إنه مايقدرش على البعد وبيستحلفها ترجع من الفراق وإنه فراقها أصعب من إنه يستحمله.