بعد ما تعرض 15 فنان وشخصية عامة لحوادث سرقة حساباتهم علي السوشيال ميديا خلال الأسبوع اللي فات بس، قرر مجموعة من الشباب إنهم يطلقوا حملة توعية ضد القرصنة الإلكترونية عن طريق عمل فيديوهات على اليوتيوب، وفيسبوك، وإنستجرام بيقولوا فيها أشهر الطرق اللي بيتم بيها القرصنة، وإزاي تحموا حساباتكم الإلكترونية من السرقة.
قال علي عثمان مؤسس المبادرة إن عمليات القرصنة الإلكترونية زادت بنسبة كبيرة الفتره اللي فاتت، وكلها كانت بتتم بنفس الطريقة تقريباً. فمعظم عمليات القرصنة بتتم عن طريق إرسال إيميل على البريد الإلكتروني برسالة تأكيد للرقم السري الخاص بحساب الشخص اللي هيتم سرقته على السوشيال ميديا، وبعد كده بيتم سرقة الحسابات بمنتهى السهولة.
ولأن الموضوع ده بقى بيحصل كتير وزاد عن حده، بقى ضروري توعية وتثقيف الناس بالطرق اللي بتتم بيها عمليات القرصنة، وإزاي نقدر نفرق ما بين بريد إلكتروني حقيقي ومزيف، وإزاي نحمي الحسابات من أي اختراق. وده اللي هيتم التوعية بيه في الفيديوهات اللي هتنزل قريب أوي.
وقال علي أنهم قدروا يرجعوا بعض حسابات المشاهير اللي اتسرقت مؤخرًا، وكان أخرهم حساب الإنستجرام بتاع الإعلامية مفيدة شيحة اللي كان اتسرق لمدة يومين، وقدر علي والشباب انهم يرجعوه كجزء من حملتهم للتوعية ضد الاختراقات الإلكترونية، ومساعدة الناس في استعادة حسابتهم.