واقعة تابعناها كلنا امبارح، واتفاعل معاها رواد مواقع التواصل الاجتماعي بغضب واستنكار كبير، بعد ما اتوثق فيديو لعامل نظافة وهو بيتطرد من مطعم كشري، وقت ما كان بيطلب وجبة له من المكان، واتقال له “اطلع برا واحنا هنجيبلك الأكل”.
العامل في بث مباشر له مع “المصري اليوم” بعد ما وثقت الكاميرا تفاصيل الحوار اللي دار بينه وبين مدير المحل، بيقول: “دي مش المرة الأولى من مدير المحل، وهما بيتعاملوا مع عمال النظافة بشكل سيء، وبرغم إني دفعت تمن وجبة الكشري طردني، فسألته بتطردني ليه وماردش عليا”.
وكمل كلامه وقال: “أنا حسيت بكسرة نفس وإهانة، وأحرجني قدام كل الموجودين، ما قدرتش بعدها أقف على رجلي ونفسي اتكسرت، أنا إنسان زيّ أي حد، ولبسي نضيف، أنا متعود أجيب علب وباكل برا علشان الناس ماتقولش عامل النظافة بياكل معاهم في المحل، بس نعمل إيه أكتر من كده؟ مانطلبش أكل؟ ده احنا اللي بنلم زبالتهم كل يوم”.
بث مباشر | كسروا نفسي.. طرد عامل نظافة من محل كشرى شهير بسبب ملابس العمل: “أنا بآكل بفلوسى وشغلى مش عيب”
Posted by المصري اليوم on Saturday, October 22, 2022
رد إدارة المطعم
إدارة مجموعة مطاعم “كشري التحرير” قالت إنها اخدت إجراءات فورية علشان اللي حصل ما بين عامل النظافة وواحد من عمال المطعم في فرع الدقي، وإنه تم التحقيق في اللي حصل واعتبروه سوء تفاهم، والصور اللي تم التقاطها بتشير إن العامل أخد الوجبة، وإدارة المعطم قررت معاقبة الموظف المسؤول وأبلغته بعدم الحضور تاني، وإن دي أخطاء فردية وفي ناس بتتربص لهم.
ردود فعل الإعلام والسوشيال ميديا
علقت الإعلامية “عزة مصطفى” وقالت: “الراجل دفع فلوس اللي هياكله ازاي تطرده برا؟ ليه في ناس ماعندهاش حس إنساني، إيه المشكلة واحد لابس بدلة النظافة يشتري من محل الكشري، مش قادرة أفهم إدارة محل الكشري ده ازاي بتتعامل مع البشر” وكملت كلامها وقالت: “مش عايزاك تزعل أو تتأثر، احنا من غيركم الشكل مش هيكون لطيف، واحنا بنعتذر لك عن الغباء والشكل غير الإنساني اللي تم التعامل به معاك”.
وبالنسبة لرواد السوشيال ميديا، فاتنشر هاشتاج على باسم المطعم، والناس نادت بحملات مقاطعة للمكان، وقالوا إن دي مش أول مرة، وعلق شخص وقال: “يعني مش كفاية واخد علبة كشري صغيرة مش هتشبعه أصلًا يعتبر تصبيرة وبـ 15 جنيه!! وهو أصلًا راتبه لا يتعدى الـ 3000 شهريًا وده إذا حصلهم يعني، كمان بتكسر بخاطره وتطرده وهو دافع زيّه زيّ أي حد، والله يا عم ما هعتب المكان دا تاني لحد ما ينزل اعتذار رسمي وتاكل مدى الحياة من عندهم”.
وعلق شخص تاني وقال: “في كل أنحاء العالم بيتم تكريمهم، وهم أهل للتكريم، وفي اليابان بيطلقوا على عامل النظافة لقب مهندس”. وعلقت سارة وقالت: “مفيش مسمى وظيفي “زبال” اسمه عامل نظافة، الزبال ده مصطلح بيطلق على الشخص اللي بيرمي نفاياته في الشارع، أما المحترمين هما اللي بيكنسوا الشوارع، واسمهم “عمال نظافة” لإنهم بينضفوا الأرض اللي بنمشي عليها”.