صحينا الصبح على خبر محزن ومؤسف، وفاة عيلة كاملة مكونة من 5 أبناء وأب وأم بسبب تسريب الغاز، وفي وصف لواحد من شهود العيان قال إنه اكتشف الحادثة لما “الموتور” كان شغال طول الوقت وماكانش في مياه، فطلع لكل الشقق يسألهم مين مشغله. ولما وصل عند شقة الضحايا شم ريحة غاز، اتعرف بعد كده إنه “غاز أول أكسيد الكربون”، ففتح الباب واكتشف إن السخان شبه مولع من برا بسبب طول فترة استخدامه وبالتالي فقد خاصية الفصل الأوتوماتيكي.
وللأسف دخل الشقة لقى كل واحد مرمي في مكان في الشقة والجثث في حالة تجمد. الأب محمد مدير مدرسة (58 سنة)، وزوجته منال (51 سنة). والأولاد سارة (26 سنة)، وعمر (23 سنة) طالب بكلية الهندسة. وعاطف (19 سنة) طالب ثانوية، وسما (15 سنة)، وسمية (13 سنة).
احنا مش بنتكلم عن أخبار كئيبة ومحزنة زيّ دي من باب إننا ننكد عليكم بس كان لازم نزود التوعية بخطورة استخدام الغاز في البيت. وازاي نتجنب حاجة زيّ دي إنها تحصل خصوصًا إن الغاز ده معروف بإنه قاتل صامت، الغاز اللي ماتوا به هو أول أكسيد الكربون وهو بينتج عن احتراق غير كامل للوقود، فيطلع منه بخار مستحيل إنك تشوفه ولا له ريحة علشان تاخد بالك وتبدأ تاخد في احتياطك. للأسف الشخص بيشم منه وبيتخنق وهو مش عارف إنه بيتخنق، والشخص مش بيحس به غير بعد ما يكون خلص عليه. عامل زيّ الموت البطيء بيمنع الدم إنه يوصل الأكسجين في المخ، فيحصل نوع من أنواع الشلل، وده اللي فسره شاهد العيان لما قال إن الضحايا كانوا في حالة تجمد في مكانهم.
طب ازاي نحمي نفسنا وعيلتنا؟
- لازم صيانة دورية على كل الأجهزة اللي مصدرها الوقود علشان نتجنب أي تسريب.
- نقفل أي مصدر للوقود زيّ السخان طالما احنا مش محتاجينه، ونفتحه عند اللزوم.
- لازم يبقى في تهوية طول الوقت للأماكن اللي موجود فيها الأجهزة دي علشان لو حصل تسريب يلاقي مكان يخرج منه.
- الدفايات اللي بنستعملها في الشتا وبنسيبها شغالة في نفس غرفة النوم وننام. ده أكبر خطر لازم تتقفل قبل النوم علشان بتسحب الأكسجين.
- محابس المياه السخنة لازم نتأكد إنها مقفولة في حالة قطع المياه. لإنها بتشغل السخان من غير ماتحس.
- ماينفعش أي سخانات تتركب في الحمام من غير مدخنة. ولازم فتحة للمدخنة وفتحة للتهوية.