انتشر من فترة على الفيسبوك فيديو بيحصل فيه تنمر وأذى لشخص أسيوي على الطريق الدائري بسبب انتشار فيروس الكورونا لدرجة إنه كان مرعوب ومُحاصر على الكوبري في منظر مؤلم، واحنا مقدرناس منتكلمش عنه.
الموقف ككل هيخليك تحس بالغضب الشديد من أول كلام الناس اللي في العربيات اللي جمبه لعسكري المرور اللي كان بيصرخ بهستيريا في العربيات والناس اللي مرضيتش تقف تساعده. وفوق ده كله كان سواق العربية اللي كان راكبها اللي رفض يكمل الطريق بيه وسابه واقف لوحده في نص الطريق السريع. المشهد كله ميتصدقش وفي حاجات كتيرة أوي غلط حصلت فيه، وصعب جداً تخيل وصولنا للدرجة دي من العنصرية والتنمر وعدم الأحساس بالمسئولية تجاه البشر حوالينا.
حاجة مُحبطة جداً إنك تشوف المعاملة العنصرية دي مع الأجانب اللي إختاروا بلدنا عشان يعيشوا فيها. وتعرف إيه ممكن يكون أسوء من انتشار فيروس مميت في بلاد كتيرة في نفس الوقت؟ الخوف اللي ممكن يخلي الناس قاسيين على غيرهم ومعندهمش إي تقدير أو أحساس بمشاعرهم.