بما إن الرسم، والفن، والتلوين، وحتي الزخرفة من الأساليب اللي بتدخل البهجة علي قلب اللي بيمارسها، كان طبيعي إن الأطباء يستغلوا النقطة دي، ويدخلوها ضمن الوسائل المستخدمة في طرق العلاج النفسي. ومن المنطلق ده ظهر العلاج بالفن (اللي بعد كده تحولت لقسم من أقسام العلاج الطبي).
العلاج بالفن مش مجرد نوع من أنواع الرفاهية زي ما بعض الناس بتقول، ولكن في بعض الاحيان بيكون أحسن وسيلة لعلاج الإنسان من أزمات نفسية بيمر بيها. وده لأن العلاج بالفن هو شكل من أشكال العلاج التعبيري اللي بيستخدم عملية الإبداع كطريقة للتحسين من الحالة النفسية، والعقلية، والجسدية للشخص اللي بيمر بوقت صعب.
ولأن الوعي ابتدى ينتشر الفترة دي تجاه أهمية النوع ده من العلاج في مصر، خصوصًا بعد ما أكد أطباء كبار من حول العالم على فاعليته وأهميته، بدأنا نشوف ورش فنية كتيرة في مصر والوطن العربي بتقدم برامج وكورسات بيتعلم الطلاب من خلالها بعض المهارات الفنية، بالإضافة طبعًا لتركيزهم علي الجانب المعالج. والخبر اللي فعلاً يفرح في مصر، هو إن كلية التربية الفنية بجامعة حلوان أخدت السبق وأضافت برنامج جديد تحت مسمي “العلاج بالفن” ومن خلاله هيدرس الطلاب أهمية العلاج بالفن وكيفية ممارسته.
في بيان صدر عن جامعة حلوان، اتكلموا عن أهمية العلاج “كمجال إنساني جديد” بيقدر من خلاله الإنسان إنه يفرغ الطاقة السلبية والكبت اللي جواه، ويصبه في اللوحه اللي بتديله الفرصة إنه يعبر عن نفسه ومشاعره بلغة الفن. ومن هنا جيه الحماس للجامعة إنها تضيف دبلومة العلاج بالفن لكلية التربية الفنية.
وعلشان يحصل الطالب علي شهادة الدبلومة، هيكون عليه حضور فصليين دراسيين كحد أدنى، و ست فصول كحد أقصي. ولو عايزين تعرفوا تفاصيل أكتر عن كيفية الالتحاق بالدبلومة أو الأوراق المطلوبة، تقدروا تدخلوا علي اللينك ده، وتقرأوا البيان اللي جواه كل التفاصيل اللي محتاجين تعرفوها.