زي كل عروض الموضة السنة دي، أسبوع الموضة في باريس، اللي بيعتبر واحد من أهم أسابيع الموضة اللي الكل بيستناها، هو كمان واجه مشاكل في عرضه بسبب جائحة الكورونا، وده اتسبب في إحباط لكتير من مُحبي الموضة والمهتمين بعروض الأزياء من كل دول العالم. ولكن الخبر الحلو هنا هو إن أسبوع الموضة بدأ من يوم الأثنين وهيستمر لحد يوم 8 أكتوبر، وكمان اتفتح المجال لكتير من المصممين العرب إنهم يشاركوا في عروض الأزياء، ويحطوا نفسهم على خريطة العالم في الموضة.
وبالرغم من إن مُصممين عالمين كتير اعتذروا عن أسبوع الموضة في باريس خلال الجائحة، إقامة الأسبوع السنة دي ولد مبادرة باسم “عرب في باريس” بالتعاون بين Fédération de la Haute Couture et de la Mode ومجلس الأزياء العربي(AFC) لاستضافة صالة عرض حصرية لعرض التصميمات العربية، ولتسليط الضوء على جمال تصاميم الشرق الأوسط بالإضافة لخلق لغة حوار بين المصممين العرب، والصناعة الفرنسية، وكمان المشترين الأجانب. والصالة هتكون قريبة من متاجر فخمة زي Dior و Fendi و Celine في شارع “Saint-Honore” في باريس.
ولأن كتير من المصممين العرب أبدعوا بتصميماتهم لموضة ربيع/صيف 2021، وحرصوا على مشاركة تصاميمهم مع الناس كلها، وإقامة عروض يقدروا من خلالها إنهم يبهروا كل الموجودين بالفساتين والذوق العربي الراقي، قررنا ناخدكم فى رحلة سريعة لباريس، ونقول لكم على أهم المشاركين العرب في العرض.
من المشاركين في الصالة اللي ابتدت من اليوم، 30 سبتمبر وهتكمل لحد الخامس من أكتوبر، ثنائي التصميم اللبناني AZZI& OSTA وماركة الأحذية اللبنانية Pose Design وعلامة الملابس النسائية اللبنانية Ecaille، وعبود جمال، بالإضافة لمجموعة سعد للمجوهرات المصنوعة يدويًا واللي مقرها الاصلي في نيويورك، وعلامة الملابس الجاهزة الأردنية “مدائن” و “الطوارئ”.
وفي بردو مصممين عرب قرروا إنهم يشاركوا في العرض الرقمي لأسبوع الموضة علشان يحققوا المعادلة الصعبة بين إنهم يحافظوا على الإجرائات الاحترازية ضد الكورونا وفي نفس الوقت يغتنموا فرصة المشاركة في عرض موضة كبير وضخم زي ده، ومنهم زهير مراد.