مع أول اسبوع بعد عرض مسلسلات رمضان، وضحت الرؤية والآراء تجاه المسلسلات بنسبة كبيرة، وبجانب إن في مسلسلات كانت عكس التوقعات ومخيبة للآمال كان في مسلسلات تانية أثبت نفسها مع أول حلقة وحققت المعادلة أو التوليفة اللي كله بيدور عليها في مسلسلات رمضان ومنهم مسلسل”الصفارة” بطولة أحمد أمين.
شفيق شاب عادي كان عنده حلم إنه يضيف لعلم المصريات من خلال إنه يقدم برنامج سياحي، ولكن الحلم هيروح لغيره وحد تاني هياخد النجاح ده وفي جملة بيعبر بيها عن احباطه “أحلامي عاشها غيري” ولكن هتقع في إيده صفارة سحرية هتقلب حياته خلال تلات دقائق هو هيختارهم ومن هنا تبدأ الحكاية.
سر اختلاف المسلسل وإن لفت انتباه ناس كتير وبدأت تتكلم عنه هي التوليفة، التوليفة إن المسلسل قدم قصة ورسالة بين حلقاته من خلال “الصفارة” اللي غيرت حياة بطلنا وخلتنا نسأل نفسنا معاه أسئلة تانية” هو فعلًا لو اتحطينا قدام اختيار إننا نرجع بالزمن لورا أو نطلع لقدام هنعمل إيه؟ولا الموضوع كله قدر وأنت حتى لو عملت كل الألعايب مش هتاخد غير السيناريو اللي ربنا كاتبهولك؟ فكرة الاختيار نفسها لما سـأله الراجل انهي تلات دقائق اللي هتختارهم من حياتك علشان ترجع لهم وتغير فيهم؟ معقول؟ معقول حد مننا يقدر يختار تلات دقائق من حياته؟
بجانب القصة، الكوميديا اللي في المسلسل ميزتها إنها مافيهاش ألش أو إيفيهات مش بيعمل فيها النجم مجهود علشان يضحكك، معتمدة على كوميديا الموقف أكتر، سلسة وبسيطة والضحك هنا ماكنش من باب الضحك ولكن كان من ورا القصة اللي فيها جزء تراجيدي برضه مستخبي.
والتراجيديا دي كانت من خلال التخبط اللي بيتعرض له بطلنا شفيق ورحلته في تكوين ذاته اللي بتمثلنا كلنا وإننا لسه بنسأل نفسنا بعد ما كبرنا واشتغلنا “هو أنا لما أكبر هطلع إيه” ومشاكل المجتمع اللي بينتقدها بسخرية بجانب إن رتم المسلسل ماكنش ماكنش بينزل ماكونتش تلاقي حلقة أعلى من حلقة.
الأداء الجيد ماقتصرش بس على البطل ولكن النجوم اللي معاه زي طه الدسوقي كان له حصة كمان من الإبداع واللي تخفى في شخصية الناس ماعرفتهاش للوهلة الأولى واللي قدر يعمل بينه وبين أحمد أمين لينك “حلقة وصل” في الشخصيات اللي اتلونوا بيها مع بعض ، ومحمود البزاوي اللي طلع ترند من كام مشهد بس في حوار له مع ولد صغير طلته تخطف القلب .
إنتاج عمل كوميدي معاه رسالة وفكرة بيحتاج مجهود كبير وذكاء وموهبة وتوظيف صح لكل عنصر وإلا هيتقلب السحر على الساحر وهتحس نفسك بتتفرج على بهلوانات علشان يضحكوك.