بنكبر على معتقدات كتير مغلوطة، وللأسف لإننا بنتعرض للأفكار دي من سن صغير وبنشوفها في عقليات كتير من الناس، ساعات بنصدقها من غير ما ناخد الوقت الكافي علشان نستوعبها ونفكر فيها. ومن الأفكار المسمومة اللي كتير للأسف مصدقها، هو إن الرجالة ماينفعش تبكي، وإن إظهار مشاعرهم ومناقشتها مع الناس ده بيقلل من رجولتهم وبيخليهم يظهروا في صورة ضعيفة تقلل من شأنهم.. و ده اللي اتكلم عنه ماجد مكاوي في فيديو جديد نشره.
علق ماجد على تويتة شخص كتبها كان بيقول فيها “هو في راجل بيعيط علشان متضايق؟ إيه ده؟”. وقال ماجد إن الشعور بالحزن والتعبير عنه بالعياط بيريح وإن ربنا أكيد خلق لنا القدرة دي لإنها مفيدة وبتساعد على التأقلم مع ظروف الحياة المختلفة واللي بيمر بيه أي شخص من ظروف صعبة من الناحية الصحية والنفسية أو غيره. بالإضافة لنقطة مهمة جدًا وهو إيه اللي بيحصل لما يتم كبت المشاعر دي ورفض الإفصاح أو التعبير عنها.
ليه بنشوف كتير من الرجال في حالة غضب كبير، ممكن يظهر في أقل المواقف؟ أو بنشوف رجال ممكن يكونوا مش في عمر كبير ولكن بيعانوا من مشاكل صحية كبيرة.. وليه معظم الرجال بيعانوا من الضغط والتوتر المستمر؟ ده بيرجع لأسباب كتير من أهمهم إحساس الراجل إنه ملزم يظهر في صورة قوية على طول الخط، وأي تعبير عن المشاعر السلبية أو البكاء يعتير وصمة عار حرفيًا.. وإنه مش راجل كفاية لإنه ماتحملش المشاكل أو التحديات اللي بتواجهه.
ده بيخليهم حتى بينهم وبين نفسهم مش عايزين يفكروا في اللي مضايقهم ولا يناقشوا أو يعبروا عنه، وده اللي بيتسبب في كبت معظم المشاعر السلبية اللي بتفضل تتخزن جوا الإنسان وتشكل عبء نفسي كبير عليه، فبيكون زيّ قنبلة داخلية موقوتة ممكن تنفجر في أي وقت، وتخرج على هيئة غضب أو عنف أو حتى اكتئاب شديد يفقده السيطرة على أفعاله وأقواله مع الناس المحيطة بيه.
جيه الوقت إننا نصحح المفاهيم الذكورية المغلوطة ونبدأ ننشر الوعي ونخلق مكان آمن للرجال إنهم يقولوا فيه عن اللي جواهم ويعبروا عن حزنهم وقت اللزوم، من غير ما يحسوا بالخجل أو إن الناس هتحكم عليهم إنهم رجال ضعيفة.. لإننا كلنا في الآخر بني آدمين، نستحق إننا نحصل على أقل حقوقنا زيّ التعبير عن الحزن.. ولما يبدأ شخصيات معروفة من الرجال تتكلم عن النوع ده من المواضيع اللي بتتشاف في مجتمعنا “محظورة”، ده هيساعد على نشر الوعي وتغيير نمط الذكورة السامة أو الـ toxic masculinity اللي للأسف كتير من الرجال بيعانوا منها في المجتمع..