بسبب تطورات حكم المحكمة، اشتعلت من جديد أزمة الخلاف بين الفنان محمد الشرنوبي والمنتجة سارة الطباخ، والبوست اللي كتبه الشرنوبي بناءً على الحكم، ورد سارة، لكن الأزمة مش جديدة، وابتدت من سنة، بسبب خلافات على إدارة أعمال الشرنوبي اللي كانت مسئولة عنها سارة الطباخ وشركتها، إيه الأزمة وبدأت إزاي ووصلت لفين؟
البوست بعد حكم المحكمة اللي جدد الأزمة بينهم..
وردت سارة الطباخ بعدها ببوست..
الحكاية ابتدت لما الشرنوبي رفع قضية بيطالب فيها بفسخ عقده الحصري مع سارة الطباخ من أكتر من سنة، بعد فسخ خطوبتهم بسبب خلاف حصل بينهم علشان منع حفلته في الأوبرا والتحكم في ظهوره الإعلامي باعتبارها المسئولة عن إدارة أعماله بشكل حصري حسب العقد اللي بينهم.. محمد الشرنوبي صرح بإنه مضى على العقد بسبب حبه لسارة، وساعتها كان الاتفاق هو إنه لو حس إنه عايز يمشي، سارة وعدته بإنها هتسلمه العقد، لكن بعد الخلاف وبعد ما العلاقة انتهت، المنتجة سارة الطباخ رفضت تسلم الشرنوبي العقد.
ومن بعدها، أكد الشرنوبي على وجود خلافات بينهم ووصفها بإنها استغلته، ووضح على صفحته على فيسبوك، إن العقد اللي بينهم بينص على إن شركتها تحتكر إدارة أعماله لمدة 10 سنين، قضى منهم أقل من سنتين، وإنه مش من حقه التعاقد على أي عمل فني على مستوى الغناء أو التمثيل إلا من خلال شركة سارة الطباخ، وقال الشرنوبي إن سارة افتعلت مشاكل بينه وبين صحابه، وبعدها حصل تعهد بالصلح بينهم بإنها هتسدد كل فلوسه، لكنها مانفذتش الاتفاق ده.