من كم يوم شوفنا البوستر الرسمي لفيلم الجريمة لأحمد عز ومنة شلبي وماجد الكدواني، أحمد عز مش أول مرة يشتغل مع منة ولا أول مرة يشتغل مع ماجد الكدواني، الاتنين عملوا مع بعض ثنائيات مميزة سواء منة شلبي في فيلم بدل فاقد وشباب تيك أواي والمسلسل الإذاعي مالك الهوى، أو ماجد الكدواني اللي عملوا مع بعض فيلم الرهينة وفيلم تيك أواي برضه وكان باين أوي الكميا العالية اللي بينهم.
والكميا دي اللي خلت لحد دلوقتي الناس تتكلم عن دورهم ويطلعوا عليه ميمز وكوميك كمان، ونجاحهم مع بعض ده اترجم لمشاريع تانية مختلفة زيّ إعلانات بيظهروا فيها مع بعض على الشاشة، والفكرة هنا مش في كم الأعمال اللي ممكن تكون اتعملت وهما شاركوا فيها مع بعض، لأ الفكرة إن ممكن من عمل فني واحد يجمع فنانين مع بعض، بس نلاقي الناس بتتكلم عليه لسنين قدام ويبقوا عايزين يشوفوهم تاني وتالت، زيّ ما حصل مع منى زكي ومحمد هنيدي وقت ما أعلنوا عن فيلم بيجمعهم بعد أخر فيلم من 20 سنة.
أحمد عز ومنة شلبي وماجد الكدواني كل واحد فيهم له أداء مميز ومختلف عن التاني بالشكل اللي لو اتجمعوا فيه مع بعض هنبقى عارفين إن المنتج الفني في النهائي هيبقى كويس، ومؤخرًا شوفنا منة شلبي وهي بتترشح لجائزة جولدن جلوب كأفضل ممثلة عن دورها في مسلسل كل أسبوع يوم جمعة، وكانت تعتبر أول ممثلة مصرية عربية تترشح لدور زيّ ده، وشوفنا ماجد الكدواني بأدائه اللي بيزيد تألق يوم بعد يوم. وأحمد عز بكاريزمته وجماهيريته، كل الأسباب دي بتأكد لنا إن العمل الفني هيبقى فعلًا يستحق المشاهدة وبيحترم عقل المشاهد.
أما عن أحداث فيلم “الجريمة”، فهي بتدور في إطار بوليسي تشويقي حول جريمة قتل، في فترة السبعينات وخلال الأحداث هنلاقي إن عز بيعاني من الهلوسة ولكن هيكتشفوا بعد كده إنه مجرم محترف بيشتغل لمجموعة من أصحاب المصالح، والأحداث هتبين لنا إيه اللي هيحصل بعد كده. الفيلم من إخراج شريف عرفة وإنتاج هشام عبد الخالق وبيشارك في البطولة محمد الشرنوبي ونبيل عيسى ورياض الخولي وسيد رجب.