البقدونس من النباتات العشبية المعمرة، وبيتم استخدامه في تزيين أطباق الأكل، ولكن بالرغم من إن ممكن يكون استخدامه كتزيين مش مهم، ولكن البقدونس بيحتوي على فوائد كتيرة ومهمة جدًا، وهو يعتبر من أكتر 3 أعشاب مفيدة في العالم، وهو بيدعم صحة الجهاز الهضمي، وبيزيد من مستويات الجلوتاثيون المضاد للأكسدة الرئيسية في الكبد، وبيساعد في تجديد أنسجة الكبد، وبيساعد على إنتاج العصارة الصفراوية في الكبد لهضم الدهون في الأمعاء، وبيقلل مستويات السكر في الدم، وبيخفض ضغط الدم، وبيحتوي على فيتامينات ومعادن كتيرة زيّ فيتامين أ، وفيتامين ب، وفيتامين سي، وحديد ومنغنيز، وبوتاسيوم، وزنك، وكالسيوم، وألياف.. وعلشان كده جمعنالكم وصفات للشعر والبشرة والصحة.
مشروب البقدونس
هنحتاج كوبايتين بقدونس مفروم، و3 معالق عصير ليمون، وكرفس، وربع معلقة زنجبيل، وكوبايتين مياه.
هنحط المكونات كلها مع المياه ونغليهم لمدة 10 دقايق، ونحتفظ بيه في التلاجة، ونشربه من وقت للتاني.
سموثي البقدونس
هنحتاج تفاحة متقشرة، وحزمة بقدونس مفرومة، وليمونة، ومعلقتين عسل كبار، ونص معلقة زنجبيل، وربع كوباية مياه.
هنخلط المكونات كلها في الخلاط مع بعض لمدة دقيقتين، ونصب في الكوباية.
ماسك البقدونس للشعر
هنجيب كمية من البقدونس ونغليهم في شوية مياه مع معلقة زيت زيتون لحد ما الخليط يدوب تمامًا، ونبل فروة الرأس بمياه وندهن الخليط عليها، ونلف رأسنا بفوطة لمدة ساعة وبعد كده نغسله.
ماسك البقدونس للبشرة
هنغلي كمية من البقدونس مع شوية حليب قليلين أو مع بياض بيضة لغاية ما الخليط يكون شبه الحنة، وندهنه على بشرتنا، ونسيبه لمدة نص ساعة، ونغسله بمياه دافية وبعديها بمياه باردة.
الفتوش
هنحتاج كوباية بقدونس، ونص كوباية نعناع، وجزرة مقشرة، وعود بصل أخضر، و3 حبات فجل، وشوية خس، وحبة طماطم، وحبة خيار، وحبة فلفل رومي، وكل ده هيكون مفروم، مع رغيف عيش شامي متقطع بعد ما يكون محمص.
هنخلط كل ده مع بعض في طبق، ونسيب العيش للآخر، وهنعمل الصوص بخلط نص كوباية عصير ليمون، ونص كوباية زيت زيتون، وفص ثوم مفروم، ومعلقة ملح صغيرة، ومعلقتين دبس الرمان، وربع معلقة فلفل أحمر حلو. هنحط الصوص على المكونات ونقلبهم كويس سوا علشان الصوص يتوزع، بعد كده نوزع العيش على الوش.
التبولة
هنحتاج لـ 3 حبات طماطم متقطعة صغيرة، وكوباية بقدونس متقطع، وكوباية أوراق نعناع مفروم، وحبتين بصل أخضر مفروم، وحبتين خيار مفروم، وربع كوباية برغل، وربع كوباية ماء، وربع كوباية عصير ليمون، وربع كوباية زيت زيتون، وملح وفلفل حسب الرغبة، وأوراق خس للتزيين.
هننقع البرغل في المباه ونسيبه على جنب لمدة ربع ساعة، بعدين نغسله، ونصفيه من المياه في طبق، ونزود عليه كل المكونات، ونقلب الخليط كويس جدًا، وبعد كده نزينه بورق الخس.