أطفال كتير لسبب أو لآخر لقوا مصيرهم في دور رعاية من غير أسرة، وبرضه ناس كتير لسبب أو لآخر ماعندهمش اختيار الإنجاب، وحتى دلوقتي فيه بنات كتير بيكون نفسها تبقى أم وتعيش مشاعر الأمومة مع صعوبة الجواز لأي سبب، طيب هل فيه حاجة تحل المشكلتين مع بعض؟ الاحتضان أو الكفالة في مصر مفهوم اختلط بالتبني، وبنلاقي ناس كتير بتهاجمه بحكم إنه حرام في الشريعة الإسلامية، لكن ناس كتير ماتعرفش الفرق بين الاحتضان والتبني، وبنضيع على الكل فرصة توفير أسرة لطفل يتربى في حضنهم، وفرصة وجود إحساس الأمومة والأبوة للي محروم منه.
مؤسسات كتير منهم “الاحتضان في مصر” بتحاول توعّي بالفرق بين التبني والاحتضان، ومين فيهم اللي يُعتبر حرام وإيه اللي حلال ومستحب كمان، فهل بالعقل كده الدين هيمنع وجود فرصة عيشة أحسن لطفل يتربى وسط أسرة ويحس بإحساس الأمان وسط أب وأم بيحبوه، وهيضيع على أم أو أب ربنا مأرادش ليهم بالخلفة؟ لو فكرنا هنلاقي إن دايمًا الدين بيفكر في الأحسن لينا وإنه يُسر مش عسر. علشان كده تعالوا نعرف الفرق بين التبني اللي محرم شرعًا، وبين الكفالة أو الاحتضان.
ببساطة، التبني هو إنك تاخد طفل من الأيتام وتخليه واحد من أولادك اللي من صلبك وتسميه باسمك، وبيكون أولاد المتبني أخوة لليتيم وبناته وأخواته وعماته وما شابه محارم، وحرم الله تعالى التبني لإن فيه تضييع للأنساب، وأمرنا بحفظ أنسابنا.. أما الكفالة أو الاحتضان فهو إنك تاخد طفل يتيم وتربيه لكن باسمه واسم عيلته، ويكون الطفل عارف إنك محتضنه، وتكفله بإنك توفرله سبل الحياه الكريمة من أكل وشرب ولبس وتعليم وكل ده، وطبعًا توفير مناخ أسري صحي.