دايمًا لما بنسمع عن اكتئاب ما بعد الولادة أو الـ “postpartum depression”، بييجي في ذهننا السيدات أو الأمهات الجديدة اللي بيكون عليهم مسئوليات كبيرة ومتعبة، مابيقدروش إنهم يستوعبوها بسهولة. وفي دراسات كتير بتتكلم عن اكتئاب ما بعد الولادة، وبقى في حاليًا وعي كافي بيخلي كتير من الأمهات يلجأوا لمساعدة المتخصصين علشان يقدروا يعدوا المرحلة الصعبة دي. ولكن بالنسبة للأباء؟ الرجال والأباء هما كمان معرضين لاكتئاب ما بعد الولادة، وتم عمل دراسات علمية بتثبت ده، ولكن غير النساء، مفيش وعي كافي عن الموضوع، وبالتالي نادرًا جدًا ما بيقدروا يحصلوا على المساعدة، لإن معظم الرجال مايعرفوش حتى إنه ممكن يصيبهم.
أسباب الاكتئاب
بيصاب حوالي 10٪ من الأباء بالاكتئاب قبل أو بعد ولادة طفلهم مباشرة، وفقًا لبحث اتنشر في مجلة الجمعية الطبية الأمريكية. وده بيرجع لعوامل بيولوجية وغيرها. فبعد ولادة مولود جديد، مش بس الأم هي اللي بيحصل عندها لغبطة في الهرمونات واللي بتسبب الاكتئاب، لكن كمان الرجال – بحسب مركز Cleveland الطبي والأكاديمي. أما بالنسبة للعوامل الغير هرمونية فممكن تكون:
- انصراف الاهتمام عنه من الزوجة، بسبب اهتمامها بالمولود الجديد.
- قلة النوم بسبب المولود واللي بيزود من التوتر والاكتئاب.
- زيادة المسئوليات والضغط النفسي والمادي على الأب علشان يعول العيلة.
- عدم وجود دعم كافي من الآخرين.
- إصابة الزوجة باكتئاب ما بعد الولادة، واللي بينعكس على الزوج.
- وجود تاريخ مرضي للإصابة بالاكتئاب.
- شعور بالذنب لإحساسه إنه أب غير جيد.
أعراض الاكتئاب
الأعراض بتختلف من شخص للتاني، ولكن في بعض الأعراض المشتركة وهي:
- سرعة الغضب والانفعال.
- فقدان الاهتمام بالعمل أو الأنشطة المفضلة.
- العمل كل الوقت أو بشكل زائد عن الطبيعي.
- الانعزال أوالانسحاب من العائلة والأصدقاء.
- الشعور بالإحباط والحزن واليأس أو الإرهاق.
- فقدان الشهية.
علاج الاكتئاب
العلاج لاكتئاب ما بعد الولادة بينقسم لشقين، الشق الأول بيتطلب من الأب نفسه اتخاذ بعض الخطوات للتغلب على المشاعر السلبية، والشق التاني بيكون دور الزوجة والناس المحيطة في توفير دعم نفسي للأب خلال المرحلة دي.
- اتباع نظام غذائي صحي.
- الرياضة.
- ضرورة احتواء الزوجة والمقربين للأب وتوفير الدعم النفسي.
- الذهاب لاستشاري نفسي أو متخصص عند الضرورة.
للأسف بيتظلم كتير من الرجال خلال فترة حمل الزوجة وولادة طفل جديد، لإنه بيكون الشخص الأساسي اللي مطالب منه توفير الدعم النفسي والمادي للزوجة والطفل، ولكن نادرًا ما بيلاقي هو الدعم من الآخرين، طبعًا لإنها بتكون فترة صعبة على الأم والأب. علشان كده من المهم جدًا نشر الوعي عن اكتئاب ما بعد الولادة عند الرجال، وتشجيعهم إنهم يعبروا عن مشاعرهم ويطلبوا المساعدة وقت اللزوم، حفاظًا على صحتهم النفسية.