يوم الخميس 26 مايو كانت أجهزة التحقيقات المصرية بتدرس الأدلة المتاحة علشان تحل لغز جريمة شنيعة حصلت في منطقة الريف الأروربي في الشيخ زايد، وشغلت الجربيمة الرأي العام المصري وانتشرت أخبارها على السوشيال ميديا ومواقع الأخبار الإلكترونية بسبب فظاعة الجريمة، اللي راح ضحيتها خمس أفراد من نفس العيلة منهم طفلين.
الخمس جثث اللي تم العثور عليهم في منطقة الريف الأوروبي في الشيخ زايد هما جثة غفير مزرعة في المنطقة اسمه “عادل” وعنده 55 سنة، مع جثة بناته الاتنين، “منار” 17 سنة، و”هناء” 27 سنة، وهي مطلقة ومعاهم جثث أولادها الاتنين “شهد”، 6 سنين، و”مروان” 5 سنين، وتم اإرسال الجثث الخمسة لمشرحة زينهم للتشريح والكشف عن آثار الجريمة، في حين نجت زوجته اللي عندها 40 سنة من الموت.
بعد ما لقيت أجهزة الأمن الجثث الخمسة في مناطق مختلفة جنب بوابة المزرعة وداخلها وكان في على الجثث آثار ذبح بسكين، عاينوا موقع الجريمة ورفعوا الأدلة وبدأت التحقيقات مع زوجة القتيل “عادل”، وكشفت التحقيقات إن المجني عليه بدأ يشتغل في الزرعة من 6 شهور وإن صاحب المزرعة بيشتغل في السعودية ومقيم هناك.
بعد دراسة المزرعة بالكامل والمنطقة المحيطة بها، قررت النيابة العامة تتحفظ على الكاميرات الموجودة في محيط مسرح الجريمة، وبعد فحص محتويات الكاميرات والتحقيق مع العاملين في المزارع التانية في منطقة الريف الأوروبي ومراجعة آخر المترددين على المزرعة، تم الكشف عن أخر علاقات ارتبط بها القتيل خلال الشهور اللي فاتت، وعلى أساس مجموعة الأدلة اللي كشفتها النيابة العامة، تم القبض على المتهم في جريمة القتل.
وكشفت النيابة إن القتيل هرب لمحافظة سوهاج وتم بالفعل تحديد المكان اللي مستخبي فيه، وبعد القبض على المجرم في مكان اختبائه في محافظة سوهاج، اعترف بجريمته وقال إنه كان مشارك الضحية في مزرعة متأجرة في منطقة الشيخ زايد وحصل خلاف ما بينهم بعد ما قرأ الفاتحة مع بنت القتيل من غير ما يعرف وربطته بها علاقة غير شرعية، ولما أتقدم لخطبتها من والدها أترفض فـحصل خلاف ما بينهم وصل لخناقة بالإيدين وانتهت بواحدة من أكتر جرايم القتل الشنيعة اللي حصلت في مصر مؤخرًا، واللي هزت الرأي العام المصري خلال الـ 48 ساعة اللي فاتوا، بالذات بعد ما تم نشر بعض الصور الخاصة بالجريمة واللي صدمت ناس كتير بسبب محتواها العنيف.