حادثة بشعة بكل المقاييس هزت الرأي العام وقلوبنا معاها.. كلنا تابعنا امبارح قصة البنت اللي أتدبحت في وسط الشارع على إيد “زميلها” في الجامعة، وللأسف البنت دي ماتت، وفي خلال الساعات اللي فاتت حصل مستجدات كتير من اعترافات للولد وتقارير للنيابة العامة والطب الشرعي كمان.
النيابة العامة قالت إيه؟
النيابة أتكلمت عن أسباب مقتل الطالبة وقالت إن بعد ما عرضوا الجثمان، تبين إن في إصابات في العنق والصدر ومناطق تانية من الرقبة. والنيابة استمعت لأقوال اتنين من أفراد الأمن الإداري واللي أكدوا إنه فعلًا اعتدى عليها بالسكين، وعاينت مكان الحادث ورفعت كل البصمات وضبطت كل تسجيلات المراقبة.
بجانب ده، وحدة التحليل والرصد في إدارة البيان بمكتب النائب العام رصدت مقاطع الفيديو المنتشرة واللي بتصور جانب من الواقعة، وقالوا نصًا “إن الأخبار بتتناول تأويلات حول باعث المتهم لارتكاب الجريمة وغير مستندة على أدلة حقيقية رسمية، مما يؤثر بصورة مباشرة في سلامة التحقيقات، ويفضي إلى ضياع ما فيها من أدلة، ويكدر السلم العام، وينال من اعتبار ذوي المتوفاة بغير حق، ما قد يُعرض من يتداول تلك الأخبار للمساءلة القانونية.”
وفي أخر البيان، النيابة العامة أهابت بالامتناع عن تداول المقاطع والأخبار في الواقعة دي أو غيرها وتقديمها لجهات التحقيق المختصة لو هتفيد في كشف الحقيقة، من غير ما يتم تداولها على مواقع التواصل الاجتماعي، علشان مايحصلش إخلال بحسن سير التحقيقات وسريتها وسلامتها.
النائب العام يأمر بحبس قاتل الطالبة (نيرة) أمام جامعة المنصورة
أمر السيد المستشار النائب العام بحبس المتهم/ محمد عادل…
Posted by Egyptian Public Prosecution النيابة العامة المصرية on Monday, June 20, 2022
خلال الساعات الأخيرة، النيابة العامة أصدرت بيان تاني قالت فيه إن أمر السيد المستشار النائب العام بحبس المتهم، محمد عادل، أربعة أيام احتياطيًا على ذمة التحقيقات لاتهامه بقتل زميلته عمدًا مع سبق الإصرار. والنيابة كمان قالت إنها سمعت لعشرين شاهد، منهم والد المجني عليها وأختها وواحد من الطلاب في الجامعة، اللي أكدوا “تعرض المتهم الدائم للمجني عليها على إثر فشل علاقتهما ورفضها لشخصه،” وإنهم حرروا محاضر رسمية ضده لضمان عدم تعرضه ليها.
أما الطب الشرعي فقال إن في إصابة طعنية في منطقة الصدر؛ وده أدى لتهتك في الرئة الشمال، وحدوث هبوط حاد في الدورة الدموية والتنفسية.
اعترافات المتهم
أقر المتهم، محمد عادل، الطالب بالفرقة التالتة بكلية الآداب جامعة المنصورة، بارتكابه جريمة قتل المجني عليها عمدًا مع سبق الإصرار لما استجوبته النيابة العامة، ووضح إن ده بسبب خلافات عاطفية وإنها كان بيحبها ومصر على الارتباط بها بس هي رفضته وعملتله حظر من على الفيس بوك. وكمان النيابة العامة قالت إنه وضح ازاي خطط لارتكاب الجريمة.
وبعد ما الموضوع انتشر بدأنا نشوف إسكرين شوتس كتيرة من المتهم للضحية ولأصحاب الضحية في تواريخ مختلفة كان فيها نبرة تهديد بالأذى وابتزاز زيّ “أنا برضه حر لما أرد الأذى وبالشكل اللي أنا عاوزه.”
وفي آخر اعترافات ليه وفقا لليوم السابع قال “قولت لازم أخلص عليها وماخليهاش على وش الدنيا، ولما شوفتها قولت دي فرصة اريح نفسي واخلص منها، وأول ما قربت منها طلعت السكينة من الجراب وشغيت غليلي وختم كلامه “لأ اتعاطى مخدرات”
الرأي العام استقبل الموضوع ازاي؟
السوشيال ميديا انقسمت لشقين؛ شق تعاطف إنسانيًا مع الضحية، وشق تاني كان له وجهة نظر تانية.
بنات كتير تعاطفت مع الضحية، وكتير حكوا عن مواقف مشابهة اتعرضوا ليها بسبب رفضهم الارتباط بحد، وكمان الناس أتكلمت عن إنه ازاي خبر زيّ ده مابقاش حاجة غريبة، لكن دي أخبار قتل وعنف ضد المرأة بنسمع عنها بشكل يومي بأشكال مختلفة.
أما وجهة النظر التانية فكانت متمثلة في التبرير للقاتل وإن البنت هي اللي غلطانة؛ “مش لو كنتي وافقتي عليه من الأول ماكنش كل ده حصل؟”، “ده كان شاريها والدفاع عن الحب مش جريمة.” وواحد علق وقال “مش كان اغتصبها أحسن ما يموتها”، وحد تاني قال ” لبسها هو السبب”، وواحد تاني بيقول “طالعة متبرجة وتستاهل للأسف اللي حصل لها.”
العنف والقتل جريمة أيًا كان نوع الضحية.. جريمة بيعاقب عليها القانون ومفهاش مجال للآراء أو المبررات.