في الساعات الأخيرة حصلت تطورات جديدة في مسلسل اتستهداف البنات اللي بتشهده مصر مؤخرًا؛ محكمة جنايات الزقازيق بالشرقية نظرت النهارده القضية اللي متهم فيها الشاب “إسلام” بقتل سلمى بهجت بعد ما أنهى حياتها بـ19 طعنة والمعروفة إعلاميًا بـ”قضية فتاة الزقازيق”.
تصريحات المتهم قدام المحكمة
إسلام فتحي، المتهم بقتل الطالبة سلمى بهجت، قال قدام هيئة محكمة جنايات الزقازيق إنه إنسان طبيعي على الرغم إنه كان بيتعالج في مستشفى أبو العزائم للأمراض النفسية سنة 2019، وخرج منها بسبب سوء معاملة الأطباء، وأضاف إنه إنسان طبيعي، وأكبر دليل على ده هو دخوله الجامعة وتقديمه محتوى خاص بالإعلام، بحسب كلامه.
وأضاف المتهم قدام المحكمة إن والده كان بيجيب شيوخ للبيت بعد رسمه وشم على دراعه لإنه افتكر إني بقيت ملحد، وأشار إنه مش ملحد، والوشم في نظره حرية شخصية.
الأجواء حوالين المحكمة
من ناحية تانية شهد محيط محكمة جنايات الزقازيق إجراءات أمنية مكثفة، المحكمة أجلت جلساتها لبعد بكرا؛ التلات 6 سبتمبر، لطلب دفاع المتهم بضم الملف الطبي والمرافعة، وكان وصل قاتل فتاة الشرقية الطالبة سلمى لقاعة محكمة جنايات الزقازيق وسط إجراءات أمنية مشددة وفي سيارة شرطة مصفحة.
قتل الطالبة أماني على طريقة نيرة أشرف في المنوفية
حادثة مأساوية جديدة بتضاف لسجل جرائم القتل اللي بقيت موجودة بشكل مستمر، بعد نيرة في المنصورة، وبعدها سلمى طالبة الزقازيق، بقى في كمان أماني، طالبة ابنة المنوفية.
أماني الجزار، طالبة في الصف التالت الجامعي بكلية التربية الرياضية، خرجت من بيتها امبارح، السبت، وكانت أخر مرة بعد ما كان مستنيها شاب اسمه أحمد أطلق النار عليها علشان تموت على طول بسبب خرطوش في الظهر.
المتهم بارتكاب الجريمة اسمه أحمد فتحي وحاصل على مؤهل متوسط، وكان بيتربص بالمجني عليها، وبحسب المتوافر من معلومات بين سكان المنطقة اللي شهدت الجريمة، فإن الضحية رفضت الزواج من المتهم، وبحسب الأهالي في قرية طوخ طنبشا بالمنوفية إنه أتعرض ليها في الشارع كتير، وهي صدته وعلشان كده قرر ينتقم منها.
النهارده، يوم الأحد، أعلنت وزارة الداخلية المصرية اليوم انتحار القاتل، أحمد فتحي، بنفس السلاح اللي استخدمه لقتل أماني.
فريد الديب ونيرة أشرف
أتقدم المحامي فريد الديب دفاع المتهم محمد عادل، المتهم بقتل نيرة أشرف في المنصورة بطعن، قدام محكمة النقض على الحكم الصادر بحق موكله بالإعدام شنقًا، وأكد الديب في تصريح لصدى البلد إنه مش بيدافع عن الجريمة ولكنه بيدافع من الناحية القانونية، وأضاف إن في أربعة أسباب رئيسية أودعها في سرية تامة بمذكر الطعن ضد الحكم الصادر على محمد عادل.
