خبر انتشر في الساعات اللي فاتت عن غرامة مالية لأي عربية ملاكي هيتم رصدها وهي بترمي قمامة في الشارع، وهيتم تصويرها وإبلاغ رقمها لإدارة المرور علشان يقع عليه عقوبة من ضمنها غرامة من 500 ل1500 جنيه وتوصل للتحفظ على ترخيص العربية لحد ما يتم سداد الغرامة.
واحنا نازلين كل يوم الصبح علشان نرمي كيس القمامة (الزبالة) في الشارع عمرنا ما فكرنا شوية الحاجات دي ممكن تكون كلفتنا كام واحنا بنشتريها؟ أو فكرنا ازاي ممكن بعد ما نرميها في مكانها الصحيح ممكن تكسبنا كام؟
ازاي القمامة ممكن تبقى نعمة؟
إحصائيات وزارة البيئة بتقول إن مصر بتنتج سنويًا حوالي 90 مليون طن من المخلفات الصلبة، بمعدل 55 ألف طن بشكل يومي، ومنهم حوالي 20 مليون طن مخلفات تانية، وأكتر المحافظات اللي بتولدها هي القاهرة والجيزة والإسكندرية والقيلوبية و37% عن محافظات الدلتا السبعة.
نقيب الزبالين في القاهرة، في حواره مع اليوم السابع، قال إن محافظة القاهرة لوحدها بتنتج 16 ألف طن من القمامة؛ 40% مواد عضوية، و40% مواد صلبة ممكن إعادة تدويرها، وتدوير المخلفات الصلبة دي ممكن يساهم في توفير نسبة من الطاقة المستخدمة في صناعة الأسمنت والأسمدة العضوية، ومصر تقدر من خلال إعادة تدويرها توفر 14 ألف طن منها يزرعوا اتنين مليون فدان. في كمان دراسات بتقول إن ممكن نستفيد منها في عمل أعلاف الماشية، واللي ممكن يبقى له عائد مادي كبير، وفي نفس الوقت نتجنب الأمراض اللي مش عارفين مصدرها. وكمان من المواد اللي ممكن يعيدوا تدويرها هي النايلون الأبيض، واللي بنغلف بيه التلاجات والأجهزة الكهربائية، والسعر بيوصل ل7000 للطن، والورق اللي بنرميه كل يوم بيتم إعادة تدويره بسعر 2000.
وبالنسبة للمخلفات اللي ماينفعش نعيد تدوريها، زيّ المخلفات اللي فيها خطر أو مخلفات أسواق الخضروات وشوادر السمك وغيره، لازم يتم التخلص منها بطريقة آمنة، لإن مقالب الزبالة بتُعتبر مصدر من مصادر تلوث البيئة، وخصوصًا لما الناس بتحرقها وبيبقى لها تبعيات، زيّ السحابة السوداء وتلوث الهواء.
في إجراءات بتاخدها المحافظات مؤخرًا للتخلص الآمن من القمامة؛ منها تطوير صناديق لجمعها في الشوارع، وتوفير المعدات الحديثة اللي ممكن تساعد في القضاء على المشكلة وتخفف العبء عن عمال النظافة. وواحدة من المحافظات دي هي محافظة القليوبية اللي عملت مبادرة نشر صناديق القمامة الذكية، واللي بتتميز إنها صديقة للبيئة وتمنع أي حد إنه ينبش فيها أو يفتحها إلا من خلال عربيات المكابس الخاصة بيها.
القمامة دلوقتي بقت كنز وثروة قومية لدرجة إن بقى في دول بتتجه إنها تستوردها بدل ما تصنعها، وفي كتير من الأحيان بتُعتبر مصدر دخل في دول موجودة في العالم، بس الفكرة كلها في الاستغلال الصح للثروة دي، وبقرار الغرامة ده هنقدر نقلل على قد ما نقدر من الزبالة اللي موجودة في الشارع ونحصرها في أماكن محددة علشان نعرف نستغلها.