بنصحى الصبح مستعجلين عشان ننزل نروح الشغل، أو الجامعة، أو المدرسة، وعايزين ناخد وجبة معانا لغاية ما اليوم يخلص، ونروح البيت نتغدى. بنكون عايزين نتفادى الأكل الغير صحي، أو أكل الشارع اللي بنصرف عليه مبالغ كتيرة بس للأسف في أوقات كتيرة بنكسل وبنلجأ للحل الأسهل. علشان كدة جبنالكم 5 وصفات حادقة وحلوة لوجبات سريعة التحضير، وصحية، وغير مكلفة تقدروا تحضروها الصبح، أو قبل ماتناموا، وتتخزن في التلاجة علشان تكون جاهزة ليومكم الطويل.
جبنة قريش بالطماطم
بالكميات اللي نفضلها، هنحتاج جبنة قريش ونهرسها شوية بشوكة (وممكن نبدلها بجبنة عادية) وطماطم، وزيت زيتون، وشوية زعتر، ونقلبهم كلهم سوا مع رشة ملح وفلفل.
الجبنة القريش مصدر غني جدًا بالكالسيوم، والفسفور، والبروتين.
بطاطا بالعسل والقرفة
بنجيب 4 حبات بطاطا، نقشرهم ونقطعهم مكعبات، ونرش عليهم 3 معالق عسل أبيض، و3 معالق زيت زيتون، ومعلقتين صغيرين قرفة مطحونة، ورشة ملح وفلفل، وندخلها الفرن نص ساعة.
البطاطا في الشكل ده بتتاكل مهروسة، أو سليمة، على حسب ما نحب، وممكن نضيف في الأخر عسل لو عايزين، وهي مصدر غني بالبوتاسيوم، والكالسيوم، وفيتامين أ.
سلطة التونة بالذرة الحلوة والفاصوليا الحمراء
بنجيب علبة تونة نصفيها ونخلطها مع 50 جم ذرة حلوة، و50 جم فاصوليا حمراء معلبة، ونصف بصلة متقطعة، وطماطم، ورشة ملح وفلفل، ومعلقة زيت زيتون، ونعصر عليهم لمونة.
الذرة الحلوة غنية بالأوميجا 3، والبوتاسيوم، والحديد، وحمض الفوليك.
البيض بالبسطرمة
هنقطع البسطرمة حتت صغيرة، ونخفقها مع البيض بالكميات اللي نحبها، ونضيف وملح وفلفل حسب تفضيلنا، بعد كدة بنرفعه على النار فوق شوية زبدة قليلين، وهو على النار، نزود نوع الجبنة المفضل لينا لغاية ماتسيح، ونعمله سندويتش.
البيض بيحتوي على نسبة كبيرة من الكالسيوم والبروتين وفيتامين بي2، وبي 12، فيتامين أ، فيتامين د، والفوسفور.
موز باللبن والتمر
بنحتاج موزة، وكوباية لبن، و5 تمرات، ومعلقة عسل أبيض، ورشة فانيليا، ونضربهم كلهم في الخلاط، وبيتشرب بارد.
التمر مصدر للطاقة، وغني بالألياف الغدائية، ومضادات أكسدة، وبروتين.
