بتحتفل السعودية النهارده 22 فبراير 2023، بذكرى اليوم الوطني للتأسيس، تأسيس الدولة السعودية الأولى سنة 1727 ميلادي (1139 هجري) على إيد الإمام محمد بن سعود، وعاصمتها كانت الدرعية، وبيحتفلوا خلال اليوم بمسيرة 3 قرون كانت مليانة بالأحداث والمواقف، وباليوم اللي غير تاريخ السعودية وانتشرت فيه الثقافة والعلوم، واتأسس فيها الكيان السياسي اللي حقق لهم الوحدة والاستقرار.
ومن المقرر إن السعودية هتشهد احتفالات وفعاليات مختلفة السنة دي؛ من عروض الألعاب النارية، وعروض ترفيهية، وحفلات موسيقية بحضور مجموعة من الفنانين والفنانات.
ومن ضمن الاحتفالات المرتبطة باليوم، هتلاقي الشعب السعودي بيلبس الأزياء التقليدية من المنطقة الوسطى وأزياء المنطقة الشمالية والمنطقة الجنوبية، واللي بيغلب عليها اللون الأخضر.
وفي الرياض هيتعمل فعالية تحت عنوان “الليوان” وبتتم في 14 منطقة هتاخدك لـ 300 سنة لورا، هتشوف فيها الأسواق والأزياء السعودية التقليدية من خلال مسرحيات ومعارض، بجانب مسيرة استعراضية هتحتفل برموز التأسيس في الدرعية، ومسرحية “معلقاتنا امتداد أجداد” وهيبقى الدخول مجاني في (بوليفارد رياض سيتي وونتر وندرلاند).
وفي جدة، هتشوف الأعلام في كل حتة وألعاب نارية ومعرض فني وعدد من الندوات الثقافية، وفي المنطقة الشرقية، هتلاقي عرض مائي ثلاثي الأبعاد، بجانب إنه هيبقى في “عرضة سعودية” واللي بتعتبر واحدة من الرقصات السعودية الشهيرة في أكتر من مكان، وهيتم توزيع أكتر من 7800 هدية تذكارية.
ارتبط يوم التأسيس بشخصية محورية في التاريخ السعودي، وهو الإمام محمد بن سعود مؤسس الدولة السعودية الأولى وأول حكامها، وهو اليوم الذي تولى فيه مقاليد الحكم بالدرعية، وشهد عهده تقدم وازدهار على كل المستويات.