الاختراعات والابتكارات مابتقفش، دايمًا بيبقى في جديد ودايمًا الناس بتدور على الابتكار المفيد للبشرية، واللي هيساعدهم في حياتهم، زي الابتكار اللي هيساعد أي شخص معرض لها في أي وقت وأي عمر وبدون سابق إنذار، وهو الاكتئاب، أو زي ما بقوا يقولوا عليه “مرض العصر”.
نجح علماء أمريكيين في ابتكار علاج غير تقليدي وغير مألوف للاكتئاب وبعيدًا عن الأدوية والجلسات، من خلال تقنية تسابق شركات كتير على استخدامها في علاج بعض الأمراض اللي بتصيب الدماغ أو ترتبط به، وهي عبارة عن شريحة دماغية إلكترونية ذكية بتتزرع في الدماغ ومن مهامها تحسين المزاج والقضاء على الاكتئاب.
تفاصيل الابتكار
بحسب المعلومات اللي نشرتها جريدة (ديلي ميل – Daily Mail) البريطانية، وأشارت لها (العربية)، إن الشريحة الذكية اللي مسؤولة عن تحسين المزاج ومعالجة الاكتئاب اسمها “غرسة دماغية”، وبتتحط الشريحة تحت جلد الإنسان وبتتربط بالدماغ وبتليفون ذكي لتوفير المعلومات ومتابعة الحالة الصحية.
تحتوي “الحبة الرقمية” أو “غرسة الدماغ” على جزئين: قطب كهربائي بيتحط تحت جلد فروة الرأس و (جراب الوصفات الطبية) اللي بيستقر على شعر المستخدمين لتشغيل الجهاز، وبتبعت الشريحة نبضات كهربائية صغيرة للدماغ المصابة بالاكتئاب مرة واحدة بشكل يومي لمدة 15 دقيقة، والجهاز الخارجي ده ممكن يتشال على الرأس في حالة عدم استخدامه للعلاج، والغرسة الدماغية تقدر كمان تعرض الرسوم البيانية للمزاج والاكتئاب، اللي ممكن بسهولة تشاركها مع الطبيب.
كشفت شركة (Inner Cosmos) المتخصصة بتطوير التكنولوجيا القابلة للزرع في الجسم وصاحبة الابتكار، إن التجارب البشرية على العلاج الجديد للاكتئاب هيبدأ خلال 6 شهور، مؤسس الشركة ومديرها بيقول: “مهمتنا هي خلق عالم يستعيد القوة المعرفية للبشرية من خلال إعادة توازن العقل البشري، العالم في حالة اضطراب شديد، ما يؤدي إلى اضطراب الإدراك، حيث يشعر الملايين بالآثار، ما يؤدي إلى ارتفاع مستويات الاكتئاب، نعتقد أن نهجنا يمكن أن يهدئ حياة أولئك الذين يعانون الاكتئاب”.
هدف الشركة الأساسي من الشريحة المبتكرة هو الابتعاد عن الأدوية الموصوفة، وإن يبقى في توجه أكتر من خلال علاج أكتر فعالية، وبتأكد إن الشريحة لسه تحت التجربة، وتم زراعتها في رأس أول مريض، ودي كانت ضمن مرحلة ما قبل التجارب، ومن المقرر إنهم يختبروا الشريحة عليه لمدة سنة كاملة.
الاكتئاب مرض شائع في العالم قدر إنه يصيب 3.8% من الأشخاص، 5.0% منهم من البالغين و5.7% من البالغين اللي بتزيد أعمارهم عن 60 سنة، وبيعاني الاكتئاب حوالي 280 مليون شخص في العالم، وممكن الاكتئاب في أسوأ حالاته يسبب الانتحار، والدراسات كشفت إن الاكتئاب موجود في نص حالات الانتحار.